Тошкент, Ўзбекистон (UzDaily.uz) — Хитой Халқ Республикасида Ўзбекистон туризм йилига бағишланган тадбирлар туркумининг давоми сифатида Ухан шаҳрида (Хубей провинцияси) сайёҳлик тарғибот тадбири муваффақиятли ўтказилди. Бу икки мамлакат ўртасидаги сайёҳлик ва ишбилармонлик алоқаларини янада ривожлантиришга қаратилган Фужоудаги тақдимотдан кейинги муҳим босқич бўлди.

Ухандаги роадшов 140 дан ортиқ иштирокчини — туристик компаниялар, давлат тузилмалари, соҳага оид уюшмалар, бизнес ва оммавий ахборот воситалари вакилларини тўплади. Ўзбекистон делегацияси томонидан ташкил этилган тақдимотлар туризмнинг кенг қамровли йўналишларини қамраб олди: маданий ва тарихий меросдан тортиб табиат хилма-хиллиги ва гастрономиягача. Шунингдек, Ўзбекистоннинг ишбилармонлик туризм учун истиқболли йўналиш сифатидаги салоҳияти ҳам намойиш этилди.

Тадбир давомида Тошкент ва Хоразм вилоятларининг сайёҳлик имкониятларига алоҳида эътибор қаратилди. Меҳмонлар ушбу ҳудудларга хос бўлган ноёб меъморчилик, ҳунармандчилик анъаналари, миллий таомлар ва мавсумий саёҳатлар билан яқиндан танишиш имкониятига эга бўлдилар.  

Дастурнинг энг муҳим қисми Хубей провинцияси Халқ ҳукумати Ташқи ишлар бошқармаси раҳбари билан ўтказилган расмий учрашув бўлди. Музокаралар доирасида амалий ҳамкорликни йўлга қўйиш масалалари, жумладан, ўзаро ахборот турларини ташкил этиш, минтақавий туризмни ривожлантириш, шунингдек, Ухан ва Ўзбекистоннинг йирик шаҳарлари ўртасида тўғридан-тўғри ҳаво маршрутларини очиш истиқболлари муҳокама қилинди.

Тадбир доирасида Ўзбекистон ва Хитой туроператорлари ўртасида қўшма сайёҳлик дастурларини ривожлантириш ҳамда икки томон ўртасида сайёҳлар оқимини кўпайтиришга йўналтирилган 6 тадан ортиқ ҳамкорлик битимлари имзоланди.   

Мазкур тадбир Хитой бозорида Ўзбекистон сайёҳлик брендини фаол тарғиб қилиш ва Хубей провинцияси билан барқарор ҳамкорлик учун мустаҳкам асос яратиш бўйича изчил стратегиянинг навбатдаги босқичи бўлди.