Ўзбекистон ва TÜGİAD фармацевтика саноатини ривожлантириш масалаларини муҳокама қилишди

Тошкент, Ўзбекистон (UzDaily.uz) — Фармацевтика тармоғини ривожлантириш агентлиги директори Абдулла Азизов ҳамда Туркия ёш тадбиркорлар ассоциацияси TÜGİAD (Türkiye Genç İş İnsanları Derneği) делегацияси вакиллари билан ишчи учрашув бўлиб ўтди.

Учрашув давомида томонлар Ўзбекистонда фармацевтика тармоғини ривожлантириш бўйича инвестицион имкониятларни муҳокама қилди.

Жумладан, ишлаб чиқаришни маҳаллийлаштириш, замонавий технологияларни жорий этиш ҳамда саноат кооперациясини кенгайтириш масалаларига алоҳида эътибор қаратилди.

Шунингдек, мамлакатнинг инвестицион салоҳияти, хусусан, "Bio Pharma City" фармацевтика кластери лойиҳаси доирасида яратилган имкониятлар, шунингдек, хорижий инвесторлар учун тақдим этилаётган солиқ ва тартибга солиш бўйича имтиёзлар тақдимоти ўтказилди.

Музокаралар чоғида турк тадбиркорлари Ўзбекистон бозорида ўз фаолиятини кенгайтиришга қизиқиш билдирдилар. Хусусан, LUK Botanik компанияси юқори сифатли ўсимлик экстрактлари ва фармацевтика, нутрицевтика ҳамда косметика соҳалари учун фаол ингредиентлар ишлаб чиқаришга ихтисослашгани қайд этилди.

Компания GMP стандартлари асосида иш юритиб, суперкритик флюидли экстракция (SFE) каби илғор технологияларни қўлламоқда ҳамда илмий-тадқиқот фаолиятини фаол ривожлантирмоқда.

Учрашув якунида томонлар фармацевтика соҳасида ишлаб чиқариш, технологиялар трансфери ва инвестициялар йўналишидаги қўшма лойиҳаларни амалга ошириш орқали ҳамкорликни янада ривожлантиришга ўзаро тайёр эканликларини тасдиқладилар.