Тошкент, Ўзбекистон (UzDaily.uz) — Фармацевтика соҳасини тартибга солиш бўйича Ўзбекистон ва Миср Араб Республикаси ўртасидаги икки томонлама ҳамкорликни ривожлантириш мақсадида онлайн учрашув бўлиб ўтди. 

Тадбирда Фармацевтика маҳсулотлари хавфсизлиги маркази директори Алишер Темиров, Миср томонидан Соғлиқни сақлаш вазирининг маслаҳатчиси Dr. Muhammad Gad, Араб дори воситалари ва тиббий асбоб-ускуналар ишлаб чиқариш компанияси бошқаруви раиси Dr. Olfat Ghorab ҳамда Миср дори воситалари бошқармаси вакили Dr. Yusuf Hottemi иштирок этди.

Мулоқотда томонлар фармацевтика маҳсулотларини тартибга солиш, дори воситалари ва тиббий асбоб-ускуналарнинг хавфсизлигини таъминлаш, ҳамкорликда тадқиқот олиб бориш ва фармацевтика саноатида инновацияларни жорий этиш каби муҳим масалаларни муҳокама қилди.

Шунингдек, Миср Араб Республикасининг фармацевтика саноатидаги илғор тажрибаси билан танишиш, икки давлат ўртасида илмий-тадқиқот ҳамкорлик имкониятларини кенгайтириш ҳамда фармацевтика маҳсулотлари сифати ва хавфсизлигини таъминлашга қаратилган қўшма дастурларни амалга ошириш имкониятлари кўриб чиқилди.