Ўзбекистон Сенати Туркия билан парламентлараро ҳамкорликни мустаҳкамлаш масаласини муҳокама қилди

Тошкент, Ўзбекистон (UzDaily.uz) — Жорий йилнинг 17 декабрь куни Олий Мажлис Сенатининг Халқаро муносабатлар, ташқи иқтисодий алоқалар, хорижий инвестициялар ва туризм масалалари қўмитаси раиси Алишер Агзамходжаев “Туркия–Ўзбекистон” парламентлараро ҳамкорлик гуруҳи раиси Осман Местин билан онлайн учрашув ўтказди.

Учрашувда икки давлат раҳбарларининг қатъий сиёсий иродаси ва ўзаро ишончга асосланган дўстона муносабатлари туфайли Ўзбекистон ва Туркия ўртасида стратегик ҳамкорлик изчил ривожланиб бораётганлиги қайд этилди.

Суҳбат чоғида икки мамлакат парламентлараро ҳамкорлиги жадал ривожланаётгани қайд этилди, хусусан қонун ижодкорлиги соҳасида тажриба алмашиш, давлатлараро келишувларни ратификация қилиш ва эришилган келишувлар ижроси устидан самарали парламент назоратини таъминлаш орқали икки томонлама ҳамкорликни чуқурлаштиришга салмоқли ҳисса қўшиб келинаётгани таъкидланди.

Шунингдек, парламент қўмиталари ва парламентлараро ҳамкорлик гуруҳлари ўртасидаги алоқаларни янада фаоллаштириш, мунтазам мулоқот механизмларини йўлга қўйиш ҳамда қўшма ташаббуслар ишлаб чиқиш муҳимлигига алоҳида эътибор қаратилди.