Ўзбекистон Покистоннинг Getz Pharma фармацевтика компанияси билан ҳамкорликни ўрганмоқда

Тошкент, Ўзбекистон (UzDaily.uz) — Фармацевтика тармоғини ривожлантириш агентлиги директори Абдулла Азизов Покистон Ислом Республикасига хизмат сафари доирасида мамлакатнинг энг йирик ва нуфузли фармацевтика ишлаб чиқарувчиларидан бири - "Getz Pharma" компаниясига ташриф буюрди.

Ташриф давомида компаниянинг иккита амалдаги ишлаб чиқариш корхонаси ҳамда замонавий ускуналар билан жиҳозланган янги ишлаб чиқариш мажмуаси фаолияти билан яқиндан танишилди. Корхоналарда ишлаб чиқариш жараёнлари илғор технологиялар асосида ташкил этилган бўлиб, маҳсулотлар халқаро сифат ва хавфсизлик стандартларига тўлиқ мувофиқ экани амалда намоён этилди.

Учрашувлар давомида инвестициявий имкониятлар, ишлаб чиқаришни маҳаллийлаштириш, шунингдек, "Getz Pharma" компаниясининг Ўзбекистондаги фаолиятини кенгайтириш истиқболлари атрофлича муҳокама қилинди. Компания Ўзбекистон орқали МДҲ мамлакатлари бозорларига чиқиш бўйича режаларга алоҳида эътибор қаратилди.

Шунингдек, ҳамкорликни кенгайтиришга қаратилган тақдимот ўтказилиб, инвестиция лойиҳалари ва узоқ муддатли шерикликни назарда тутувчи аниқ йўналишлар белгиланди. Ишлаб чиқариш жараёнлари билан чуқур танишув эса "Getz Pharma"нинг сифат, хавфсизлик ва барқарор ривожланишга бўлган қатъий ёндашувини яққол кўрсатди

Getz Pharma - 1995 йилда ташкил этилган, бош офиси ва замонавий ишлаб чиқариш қувватлари Карачи шаҳрида жойлашган, 45 дан ортиқ мамлакатларга маҳсулот экспорт қилувчи йирик халқаро фармацевтика компаниясидир. Компаниянинг ишлаб чиқариш корхоналари ЖССТ (WHO), PIC/S каби халқаро стандартлар асосида сертификатланган.