Ўзбекистон ўсмирлар терма жамоаси (U-17) БААдаги йиғинларда Венесуэла билан дуранг ўйнади

Тошкент, Ўзбекистон (UzDaily.uz) — Ўзбекистон ўсмирлар терма жамоаси (U-17) БААда ўтказилаётган йиғинлар доирасида илк назорат учрашувини ўтказди.

Биринчи рақиб Венесуэла терма жамоаси бўлди ва беллашув 1:1 ҳисоби билан якунланди.

29-дақиқа ўйинда венесуэлалик футболчи Давид Гарсия ҳисобни очди, аммо 86-дақиқада Нурбек Сарсенбоев пенальтини аниқ амалга ошириб, ҳисобни тенглаштирди.

Ўзбекистон терма жамоаси кейинги назорат учрашувларини 23 октябрь куни Кот-д’Ивуарга, ҳамда 29 октябрь куни Буркина-Фасога қарши ўтказади.

Жамоа 3–27 ноябрь кунлари Қатарда бўлиб ўтадиган 17 ёшгача бўлган футболчилар ўртасидаги жаҳон чемпионатига тайёргарлик кўрмоқда. Ўзбекистон U-17 терма жамоаси J гуруҳида Парагвай, Ирландия ва Панама жамоаларига қарши майдонга тушади.