Ўзбекистон миллий терма жамоаси ФИФА рейтингида 50-ўринга кўтарилди

Тошкент, Ўзбекистон (UzDaily.uz) — Ўзбекистон миллий терма жамоаси янгиланган FIFA рейтингида ўз позициясини яхшилаб, яна дунёнинг энг кучли 50 та жамоаси қаторига кирди.

1 апрель куни эълон қилинган маълумотларга кўра, жамоа икки поғонага кўтарилиб, 1465,34 очко тўплади ва ҳозирда 50-ўринни эгаллаб турибди. Янгиланишдан олдин терма жамоа 52-ўринда эди.

Бош мураббий Фабио Каннаваро раҳбарлигида ўтган сўнгги учрашув Венесуэла терма жамоасига қарши дуранг (0:0) натижаси билан якунланди ва бу жамоага 0,03 рейтинг очкосини қўшиб берди.

Осиё минтақасида Ўзбекистон терма жамоаси бешинчи ўринда мустаҳкамланди ва фақат Япония (18-ўрин), Эрон (21-ўрин), Жанубий Корея (25-ўрин) ҳамда Австралия (27-ўрин) жамоаларидан орқада қолмоқда.

Жаҳон рейтингига Франция терма жамоаси пешқадамлик қилмоқда, у Испания ва Аргентина жамоаларини ортда қолдирган.

Энг кучли ўнликка шунингдек Англия, Португалия, Бразилия, Нидерландия, Марокаш, Бельгия ва Германия терма жамоалари ҳам кирган.