Ўзбекистон Марказий банки Humans бўйича текширув материалларини Тошкент шаҳар ИИББга топширди

Тошкент, Ўзбекистон (UzDaily.uz) — Ўзбекистон Марказий банки Humans фаолияти билан боғлиқ текширувни якунлаб, тўпланган материалларни ҳуқуқий баҳолаш учун Тошкент шаҳар Ички ишлар бош бошқармасига топширди, деб хабар қилди регулятор матбуот хизмати.

Текширув Humans компаниясига тўлов хизматлари кўрсатган Octagram тўлов ташкилотида ўтказилди. Марказий банк топшириғига кўра, Octagramда махсус ишчи гуруҳ тузилиб, комплекс текширув амалга оширилди.

Текширув якунларига кўра, материаллар қонун ҳужжатларида белгиланган тартибда кўриб чиқиш ва тегишли чоралар кўриш учун Тошкент шаҳар ИИББга юборилди.

Айни пайтда Humans билан боғлиқ вазият пойтахт ички ишлар органлари томонидан ўрганилмоқда. Марказий банк, шунингдек, ушбу ҳолат натижасида жабр кўрган фуқароларга ҳуқуқни муҳофаза қилувчи органларга мурожаат қилишни тавсия этди.

Аввал хабар қилинганидек, 2025 йил 4–8 декабрь кунлари Humans сервиси фойдаланувчиларининг бир қисми банк карталаридан маблағларни фирибгарлик йўли билан ечиб олишнинг икки тўлқинига дуч келган. 8 декабрь куни эрталаб Марказий банкка Humans иловаси орқали амалга оширилган рухсатсиз операциялар бўйича фуқаролар мурожаатлари келиб туша бошлаган.

Бунга жавобан, регулятор хавфсизлик талабларини таъминлаш ва эҳтимолий қўшимча зарарларнинг олдини олиш мақсадида Paylov тўлов сервисидан P2P-пул ўтказмаларини вақтинча тўхтатишни талаб қилди. 9 декабрь ҳолатига кўра, Humans орқали барча тўлов операциялари тўлиқ тўхтатилган.

Humans компанияси маълум қилишларича, жиноятчиларга рухсатсиз маблағ ечиб олиш имконини берган заифлик компания ҳамкори бўлган Paylov тўлов сервисининг техник тизимида жойлашган бўлиб, унинг ҳуқуқ эгаси Octagram ҳисобланади. Octagram эса ўз навбатида, ҳодисалар сабаби бўлган «техник заифлик» мавжудлиги ҳақидаги айбловларни рад этди.

Шу билан бирга, 6 декабрь куни Octagram ходимлари аниқланган шубҳали транзакциялар ҳақида Humans Companies’нинг масъул вакилларини огоҳлантиргани, шундан сўнг операциялар вақтинча тўхтатилгани қайд этилган.

Эртаси куни, 7 декабрьда, Humans Companies Octagram’га расмий хат йўллаб, фирибгарлик операцияларининг олдини олиш бўйича кўрилган чоралар ҳақида маълум қилган ва шу асосда тўловларни қайта тиклашни сўраган.