Тошкент, Ўзбекистон (UzDaily.uz) — Ўзбекистон ички ишлар вазири Азиз Тошпўлатов бошчилигидаги юртимиз делегацияси Будапештга ташрифи доирасида Венгрия ҳуқуқни муҳофаза қилиш органлари халқаро академиясида (ILEA) бўлди, деб хабар қилмоқда "Дунё" АА мухбири.

Академия вакиллари Ўзбекистон томонини таълим муассасасининг асосий йўналишлари билан таништирди ва марказнинг ҳуқуқни муҳофаза қилиш соҳасида халқаро ҳамкорликни мустаҳкамлашдаги аҳамияти ҳақида сўзлаб берди.

ILEA 1995 йилда АҚШ ва Венгрия ҳукуматлари ўртасидаги келишув асосида ташкил этилган. Академия турли мамлакатлар ҳуқуқ-тартибот идоралари ходимларини биргаликда тайёрлаш учун платформа бўлиб хизмат қилади. Мажмуа тактик операциялар, кибержиноятчилик, коррупция, уюшган жиноятчилик ва бошқа долзарб таҳдидларга қарши кураш соҳасида мутахассислар тайёрлашга ихтисослашган.

Таълим жараёни АҚШнинг Венгриядаги элчихонаси томонидан қўллаб-қувватланади ва турли мамлакатлар экспертлари билан ҳамкорликни ўз ичига олади. ILEA халқаро ҳуқуқни муҳофаза қилиш академиялари глобал тармоғининг бир қисми бўлиб, тажриба алмашиш ва минтақавий хусусиятларни ҳисобга олган ҳолда илғор тажрибаларни мослаштиришни таъминлайди.

Ўзбекистон Венгрия ҳуқуқни муҳофаза қилиш органлари халқаро академиясининг таълим дастурларида фаол иштирок этишда давом этмоқда ва ўз ходимларини, айниқса, киберхавфсизлик соҳасида малака оширишга юборишни режалаштирмоқда.

Томонлар ўзаро ҳамкорликни янада кенгайтириш, тажриба алмашиш ва ички ишлар органлари ходимларининг касбий савиясини ошириш бўйича қўшма дастурлар ташкил этишдан манфаатдорлигини билдирди.