Ўзбекистон фитосанитария стандартларини ЖСТ қоидалари билан уйғунлаштириш тўғрисидаги қонун лойиҳасини иккинчи ўқишда қабул қилди

Тошкент, Ўзбекистон (UzDaily.uz) — Мажлисда фитосанитар зарарсизлантириш фаолиятини лицензиялашга доир қонун лойиҳаси иккинчи ўқишда кўриб чиқилди.

Қонун лойиҳаси билан фитосанитар зарарсизлантиришнинг замонавий усулларини жорий этиш, ушбу фаолиятни юридик шахслар томонидан амалга ошириш, шунингдек, қишлоқ хўжалиги маҳсулотларини импорт ва экспорт қилувчилар учун янада қулай шарт-шароитлар яратиш кўзда тутилмоқда.

Шу билан бирга, зарарсизлантириш тадбирлари инсон ҳаёти ва соғлиғи, атроф-муҳит учун хавфсиз бўлган усуллар асосида амалга оширилиши белгиланмоқда.

Қонун лойиҳасига масъул қўмитанинг маълум қилишича, лойиҳани иккинчи ўқишга тайёрлаш жараёнида у ишчи гуруҳ аъзолари ва депутатлар таклифлари асосида такомиллаштирилган.

Шунингдек, айни пайтда ЖСТ талабларига мослаштиришга қаратилган бошқа қонун лойиҳаси билан такрорланаётган нормалар, хусусан, асосий тушунчалар, ваколатлар, мажбуриятлар ҳамда карантин тартиб-таомилларига оид қоидалар ушбу лойиҳадан чиқарилган.

Қонун лойиҳаси депутатлар томонидан иккинчи ўқишда қабул қилинди.