Ўзбекистон Дубайда бўлиб ўтган Gulfood 2026 кўргазмасида озиқ-овқат саноатининг экспорт салоҳиятини намойиш этди

Тошкент, Ўзбекистон (UzDaily.uz) — 2026 йил 26–30 январь кунлари Ўзбекистон Республикаси делегацияси Инвестициялар, саноат ва савдо вазирлиги Ташқи савдо департаменти директори Иномжон Абдураҳмонов бошчилигида Дубай шаҳрида ўтказилган Gulfood 2026 халқаро кўргазмасида иштирок этди.

“Made in Uzbekistan” миллий стендида 60 дан ортиқ маҳаллий корхона озиқ-овқат маҳсулотлари, мева-сабзавот, дуккакли экинлар ҳамда қуритилган мевалар бўйича мамлакатимизнинг экспорт салоҳиятини намойиш этди. БАА, Саудия Арабистони ва Форс кўрфази мамлакатларининг 20 дан ортиқ етакчи ритейлер ва дистрибюторлари, жумладан Lulu Group, Sunberry Vegetables, Ali Bin Ali Holding ҳамда бошқа йирик компаниялар билан музокаралар ўтказилди.

Музокаралар якунида ўзбек маҳсулотларини Lulu савдо тармоқларига жойлаштириш ҳамда Ўзбекистондан тўғридан-тўғри етказиб беришни йўлга қўйиш бўйича келишувларга эришилди. БАА ва Қатар ҳамкорлари билан янги бозорларга чиқиш механизмлари ҳамда экспортёрлар пулини босқичма-босқич шакллантириш масалалари келишиб олинди.

Шунингдек, БАА Ташқи савдо вазирлиги билан Кенг қамровли иқтисодий шериклик тўғрисидаги битим (CEPA) лойиҳасини ишлаб чиқиш юзасидан музокаралар олиб борилди. Томонлар қўшма ишчи гуруҳ тузиш ҳамда жорий йил давомида 500 дан ортиқ товар позициялари бўйича преференциал савдо шартларини жорий этиш бўйича келишувга эришдилар.