Ўзбекистон аҳолиси 8 октябрга ўтар кечаси “Суперой” ҳодисасини кузатиши мумкин

Тошкент, Ўзбекистон (UzDaily.uz) — Бугун, 7 октябрдан 8 октябрга ўтар кечаси Ой Ерга энг яқин масофага яқинлашиб, бир вақтнинг ўзида тўлин ой фазасига етади. Бу камдан-кам учрайдиган астрономик ҳодиса “Суперой” номи билан маълум.

Ерга нисбатан яқинлиги сабабли табиий йўлдош одатдагидан анча каттароқ ва ёрқинроқ кўринади.

Астрономларнинг таъкидлашича, суперойни қуролсиз кўз билан ҳам кузатиш мумкин — ҳаво очиқ бўлса, у бутун тун давомида аниқ кўринади. Кузатиш учун энг яхши вақт — Ой чиққан заҳоти ва ярим тун атрофида, у юқорига кўтарилиб, айни вақтда энг ёрқин нур таратади.

Мутаҳассислар сўзларига кўра, бундай ҳодисалар йилига бир неча марта содир бўлади, аммо ҳар бири Ой орбитаси ва Ердан масофасига боғлиқ ҳолда ўз хусусиятларига эга бўлади.

Шу тариқа, 8 октябрга ўтар кечаси куз осмонидаги энг ҳайратланарли манзаралардан бири — ёрқин ва ҳайбатли суперойни томоша қилиш учун ажойиб имконият бўлади.