Озарбайжон Марказий Осиё саммити форматига қўшилди

Тошкент, Ўзбекистон (UzDaily.uz) — Озарбайжоннинг Марказий Осиё давлатлари консультатив учрашувлари форматига қўшилиши тарихий воқеа бўлиб, Марказий Осиё ва Жанубий Кавказ ўртасидаги алоқаларни мустаҳкамлаш учун янги имкониятлар очди.

Бу ҳақда Боку шаҳрида бўлиб ўтган XIII Глобал Боку форумида Ўзбекистон Президентининг ташқи сиёсат масалалари бўйича маслаҳатчиси Абдулазиз Кoмилов маълум қилди.

«Муҳим қадамлардан бири Озарбайжон Президенти Илҳом Алиевнинг Марказий Осиё давлатлари етакчилари саммитида иштирок этиши бўлди. Ушбу саммитда Озарбайжон минтақавий мулоқотга қўшилди. Бу воқеа минтақаларимиз ўртасидаги алоқаларни мустаҳкамлаш учун катта аҳамиятга эга», — деди Камилов.

Report.az нашрининг хабар беришича, у ҳозирги пайтда давлатлар Марказий Осиё ва Жанубий Кавказ ўртасидаги ўзаро боғлиқликни кучайтирувчи янги геоиқтисодий макон яратиш масаласини муҳокама қилаётганини таъкидлади.

Унинг сўзларига кўра, бундай ҳамкорлик савдо-иқтисодий муносабатларни ривожлантириш, энергетика соҳасидаги ҳамкорликни кенгайтириш ва минтақа давлатлари ўртасидаги гуманитар алоқаларни мустаҳкамлашга хизмат қилади.