Оила ҳалок бўлган портлаш иши бўйича газ корхонаси раҳбари ва ходимлари 7 йилдан қамалди

Тошкент, Ўзбекистон (UzDaily.uz) — Самарқанд шаҳар жиноят ишлари бўйича суди раиси Зарифа Аҳмедова раҳбарлигидаги ҳайъат «Ҳудудгаз Самарқанд» корхонаси филиали раҳбари ва уч нафар ходимига ҳукм чиқарди. Уларга бир оиладан етти киши, шу жумладан уч нафар кичик бола ҳалок бўлган портлаш иши бўйича жиноий жавобгарлик юклатилди, деб хабар берди Sevimli телеканалидаги Zamon видеодастури.

Дастлаб Фавқулодда вазиятлар вазирлиги олти нафар ҳалок бўлгани ҳақида маълум қилган эди.

Портлаш 9 май куни содир бўлиб, натижада бир нечта оила яшаган уч қаватли турар жой тўлиқ вайрон бўлган. Шунингдек, яқин атрофдаги бинолар ҳам зарар кўрган.

Маълум бўлишича, уй аҳолиси газ ҳидининг мунтазам пайдо бўлиши ҳақида газ хизматига ўн бир марта мурожаат қилган, аммо масъул ходимлар томонидан зарур чоралар кўрилмаган.

Тўққиз жилддан иборат жиноят иши материалларига кўра, 2024 йил сентябрь–октябр ойларида Спитамен кўчасида лойиҳа ҳужжатларисиз ва зарур техник шартларсиз хусусий уйларни газлаштириш ишлари олиб борилган.

Газ қувури меъёрларга зид ҳолда ётқизилган: лаборатория хулосасисиз, ҳимоя қопламасисиз, автомобил йўли остида, ёлланган усталар орқали, амалдаги тармоққа ноқонуний уланиш орқали. Қувурдаги етти тешик орқали табиий газ марказий канализация қудуқларига, у ердан эса уй ичига кириб борган.

Суд шаҳар бўлими раҳбари ва унинг уч нафар ходимини Ўзбекистон Республикаси Жиноят кодексининг 116-моддаси 4-қисми «а» ва «б» бандларида назарда тутилган жиноят — касбий вазифаларни лозим даражада бажармаганлик оқибатида одамлар ҳалок бўлиши ва бошқа оғир оқибатларга сабаб бўлганлигида айбдор деб топди.

Ҳар бирига етти йил муддатга озодликдан маҳрум этиш жазоси тайинланди. Шунингдек, уларга давлат иштирокидаги ташкилотларда раҳбарлик ва моддий жавобгарликка оид лавозимларни эгаллаш ҳуқуқидан уч йил муддатга маҳрум этиш жазоси қўлланилди.

Бундан ташқари, суд корхонадан жабрланган фуқаролар фойдасига деярли 6 миллиард сўм ундириш ҳақида қарор чиқарди.