«Ўзбекнефтгаз» ва «Schlumberger» қўшма лойиҳаларнинг бориши ва ҳамкорликнинг янги йўналишларини кўриб чиқдилар

Тошкент, Ўзбекистон (UzDaily.uz) — Музокаралар чоғида томонлар ўзаро ҳамкорликнинг жорий ҳолати, амалга оширилаётган қўшма лойиҳалар ижроси ҳамда “Мустақилликнинг 25 йиллиги” конида қўшимча разведка ва ўзлаштириш ишларининг истиқболларини муҳокама қилдилар.

Шунингдек, мулоқотда мазкур кондаги авария ҳолатини бартараф этиш масалалари ва ушбу жараёнда «Schlumberger» компаниясининг иштироки имкониятлари алоҳида кўриб чиқилди. Компания вакиллари аввал тақдим этилган техник ва тижорий таклифлар қайта ишланиб, тез фурсатда яна тақдим этилишини маълум қилди.

Томонлар илғор технологияларни жорий этиш, нефть-газ операциялари самарадорлигини ошириш ҳамда конда қидирув, ўзлаштириш ва бошқарув жараёнларида инновацион ечимларни кенг қўллаш муҳим аҳамиятга эга эканини таъкидладилар.

Учрашув якунида томонлар стратегик шерикликни янада ривожлантириш ва технологик ҳамкорликни кенгайтиришга ўзаро тайёр эканликларини билдириб, бу ҳамкорлик Ўзбекистон нефть-газ соҳасининг барқарор ривожланишига хизмат қилишини қайд этдилар.