Ўзбекистоннинг Исроилдаги элчихонаси TikTok’даги мамлакат фуқароси билан боғлиқ ҳодиса юзасидан изоҳ берди

Тошкент, Ўзбекистон (UzDaily.uz) — Ўзбекистон Республикасининг Исроилдаги элчихонаси мамлакат фуқароси иштирокида содир бўлган ва жамоатчиликда резонанс келтириб чиқарган ҳодиса ҳақида маълум қилди.

2026 йил 28 февраль куни Ўзбекистон фуқароси Н.Х. TikTok тармоғида ракета зарбаси ва сиреналар ёқилган пайтда тасвирга олинган видеони жойлаштирган бўлиб, унда қабул қилиб бўлмайдиган ифодалар ишлатилган. Видеоматериал Исроил ижтимоий тармоқлар сегментида кенг тарқалиб, жамоатчилик орасида катта норозиликка сабаб бўлган.

Мазкур ҳолат юзасидан Исроил фуқароси А.Х. полицияга мурожаат қилган. Ўзбекистон элчихонасининг консуллик бўлими Н.Х. билан зудлик билан боғланиб, у билан суҳбат ва тушунтириш ишларини олиб борди, шунингдек Исроил томони билан ҳамкорлик қилди. Ҳозирда Н.Х. хавфсиз шароитда бўлиб, вазият консуллик бўлими томонидан тўлиқ назорат қилинмоқда.

Элчихона Ўзбекистон фуқароларини маҳаллий қонунчиликка қатъий риоя қилишга, ўз хатти-ҳаракатларида эҳтиёткор бўлишга, провокацияларга йўл қўймасликка ҳамда ракета ҳужумлари вақтида Исроил фронти қўмондонлиги томонидан бериладиган хавфсизлик бўйича тавсияларга сўзсиз амал қилишга чақиради.