Ўзбекистонда Зафар куни нишонланди

Тошкент, Ўзбекистон (UzDaily.uz) — Ўзбекистондаги Озарбайжон Республикасининг Элчихонаси ва унинг ҳузурида фаолият юритаётган Ҳайдар Алиев номидаги Озарбайжон Маданият Маркази томонидан “Вйндҳам Ташкент” меҳмонхонасида Зафар куни муносабати билан тантанали қабул ташкил этилди.

Тадбирда Ўзбекистон Ташқи ишлар вазирининг ўринбосари Бабур Усмонов, давлат идоралари ва халқаро ташкилотлар вакиллари, дипломатик корпус аъзолари, фан, маданият ва санъат намояндалари, ватандошларимиз ҳамда ОАВ вакиллари иштирок этдилар.

Иштирокчилар дастлаб Зафар кунига бағишланган фотокўргазма билан танишдилар. Озарбайжон ва Ўзбекистон давлат мадҳиялари янграганидан сўнг, Озарбайжон Республикасининг Ўзбекистондаги Фавқулодда ва Мухтор Элчиси Ҳусейн Гулиев меҳмонларни байрам билан табриклаб, икки мамлакат ўртасидаги муносабатлар мустақиллик йилларида стратегик шериклик даражасига кўтарилганини таъкидлади.

Элчи шундай деди: “Озарбайжон Президенти, Олий Бош Қўмондон Илҳам Алиев раҳбарлигида 44 кунлик уруш натижасида ерларимиз Арманистон босқинидан озод этилди ва бугун озод қилинган ҳудудларда кенг кўламли қайта тиклаш ва қурилиш ишлари олиб борилмоқда.”

Дипломат қўшимча қилди: “Биз тарихнинг янги саҳифасини очиб, тинчлик ва барқарорлик шароитида биргаликда яшашга тайёр эканлигимизни намойиш этдик.”

Шунингдек, у таъкидлади: “Габала шаҳрида ўтказилган Турк Давлатлари Ташкилоти саммити Президент Илҳам Алиевнинг ЪТурк Давлатлари Ташкилоти — бу бизнинг оиламизʼ деган фикрининг тасдиғи бўлди.”

Элчи Ўзбекистоннинг Қарабоғ масаласида Озарбайжоннинг адолатли позициясини қўллаб-қувватлаб келаётганига ва бу йўналишда намойиш этган принтсипиал ёндашуви учун Ўзбекистон Президентига ҳамда биродар ўзбек халқига миннатдорлик билдирди. Шунингдек, Зафарнинг 5 йиллиги муносабати билан Озарбайжонни биринчи бўлиб табриклаган давлат айнан Ўзбекистон бўлгани қайд этилди.

Тадбир давомида Озарбайжон Президенти Илҳам Алиевнинг Ўзбекистонга, ҳамда Ўзбекистон Президенти Шавкат Мирзиёевнинг Озарбайжонга ташрифлари, Арманистоннинг Озарбайжонга тажовузи, озод қилинган ҳудудларда олиб борилаётган кенг кўламли қурилиш ишлари ҳақида видеоматериал намойиш этилди.

Тантанали дастур маданий қисм билан давом этди. Зафар кунига бағишланган маданий дастур доирасида Ўзбекистон Халқ артисти Женисбек Пиязовнинг чиқиши катта қизиқиш билан қарши олинди. Унинг озарбайжон ва ўзбек тилларида куйлаган қўшиқлари томошабинлар томонидан олқишлар билан кутиб олинди ва тадбирга алоҳида руҳ бағишлади.

Тадбир якунида иштирокчилар Зафар куни муносабати билан Озарбайжон миллий таомларидан татиб кўришди.