Тошкент, Ўзбекистон (UzDaily.uz) — Туризм хизмати сифати ва қулайлигини ошириш, шунингдек, шинам транспортга бўлган талаб ортиб бораётганини инобатга олган ҳолда, Туризм қўмитаси ҳузуридаги «Сайёҳларга хизмат кўрсатиш маркази» давлат унитар корхонаси томонидан маҳаллий ва хорижий сайёҳлар учун премиум тоифадаги автотранспорт воситаларини тақдим этиш йўлга қўйилди.

Ташаббус замонавий, халқаро стандартларга жавоб берадиган туристик инфратузилмани ривожлантириш ҳамда Ўзбекистоннинг меҳмондўст ва юқори даражада ривожланган туристик дестинация сифатидаги ижобий имижини мустаҳкамлашга қаратилган.

Янги автопаркга Mercedes-Benz тоифасидаги репрезентатив классдаги енгил машиналар, Sprinter микроавтобуслари ҳамда замонавий туристик автобуслар киради.

Барча автотранспорт воситалари климат-назорат тизими, симсиз интернет, қулай чарм салонлар билан жиҳозланган ва хорижий тилларни биладиган малакали ҳайдовчилар хизмат кўрсатади.

Хизматлар аэропортлардан трансфер, шаҳар ичидаги ва шаҳарлар орасидаги сафарлар, экскурсия йўналишлари ҳамда индивидуал ва гуруҳли турларни ташкил этишда тақдим этилади.

Ушбу ташувлар, айниқса, халқаро форумлар, ишбилармонлик тадбирлари, расмий делегацияларнинг ташрифлари ва VIP меҳмонларни қабул қилиш доирасида катта талабга эга.

Туризм қўмитаси Ўзбекистоннинг халқаро туризм бозорида рақобатбардошлигини оширишга хизмат қилувчи хавфсиз, қулай ва замонавий туристик инфратузилмани шакллантириш юзасидан тизимли ишларни давом эттирмоқда.