Тошкент, Ўзбекистон (UzDaily.uz) — Ўзбекистонда давом этаётган аномал иссиқликлар фонда кунлик электр энергияси истеъмоли бўйича янги рекорд ўрнатилди. Бу ҳақда Энергетика вазирлиги матбуот хизмати хабар берди.

Миллий диспетчерлик маркази маълумотларига кўра, 2025 йил 16 июлдан 21 июлгача бўлган аномал иссиқ даврда Ўзбекистон энергетика тизимида суткалик электр энергияси истеъмоли ва юкламаси бўйича янги тарихий рекордлар қайд этилди.

Илк бор ёзги кўрсаткичлар қишки максимумдан ошиб кетди. Жумладан, 18 июль куни истеъмол қилинган электр энергияси ҳажми 272,6 миллион кВт⋅соатни ташкил этди. Бу эса аввалги қишки рекорд (271,8 миллион кВт⋅соат) ва ёзги рекорд (253,3 миллион кВт⋅соат)дан юқори.

Бундан ташқари, 21 июль куни соат 17:00 да энергетика тизимида юклама 13,3 ГВтга етди. Бу кўрсаткич ҳам қишки максимум (12,5 ГВт), ҳам 2024 йил июлидаги даража (11,8 ГВт)дан анча юқори.

Тошкент шаҳрида истеъмол ўсиши айниқса сезиларли бўлди. Бу ерда кунлик электр энергияси истеъмоли 32,4 миллион кВт⋅соатни ташкил этди, бу эса ўтган йилнинг шу даврига нисбатан 33% кўпдир. Максимал юклама 1811 МВтни ташкил этди, бу ҳам ўтган йилги кўрсаткич (1680 МВт)дан юқори. Умумий ҳисобда июль ойидаги истеъмол ўтган йилга нисбатан 7,6% га кўпайган, ой бошидан бери ўсиш 11% ни ташкил этган.

Энергетика вазирлиги маълум қилишича, тармоқнинг барқарор ишлашини таъминлаш ва юклама юқори бўлган соатларда носозликларни тезкор бартараф этиш мақсадида «Ҳудудий электр тармоқлари» компанияси томонидан туну кун фаолият юритувчи аварияли бригадалар ташкил этилган. Шунингдек, аҳолига мурожаат йўллаб, электр энергиясидан оқилона фойдаланиш ва заруратсиз юқори энергия талаб қиладиган ускуналарни ишга туширмаслик тавсия қилинди.