Ўзбекистон заргарлик брендлари Нью-Йоркдаги кўргазмада мамлакатимизни намойиш этди

Тошкент, Ўзбекистон (UzDaily.uz) — Ўзбекистон Республикаси Инвестициялар, саноат ва савдо вазирлиги маҳаллий ишлаб чиқарувчилар ва экспортёрларнинг халқаро ярмарка ва кўргазмаларда иштирокини тизимли равишда ташкил этиб келмоқда.

26–28 октябрь кунлари Вазирлик делегацияси АҚШнинг Нью-Йорк шаҳрида ўтган JA New York халқаро заргарлик кўргазмасида Ўзбекистоннинг етакчи заргарлик компаниялари иштирокини бошқарди.

Кўргазмада CARATO, ST TILLO KORI, FANON, SOUVENIR ва BUTTERFLY заргарлик уйлари ўз маҳсулотларини намойиш этдилар.

Миллий услубда яратилган, анъанавий нақшлар замонавий дизайн билан уйғунлашган асарлар ташриф буюрувчиларда катта қизиқиш уйғотди. Ҳар бир заргарлик буюми Ўзбекистоннинг нафислиги ва бой маданий меросининг рамзига айланди.

Тадбир доирасида кўргазмада иштирок этган мамлакатларнинг 10 дан ортиқ компаниялари билан B2B учрашувлар ўтказилди. Муҳим жиҳатлардан бири - Jewellers of America ассоциацияси билан бўлиб ўтган музокаралар бўлиб, унда барқарор бизнес алоқаларини ўрнатиш ва ҳамкорликни ривожлантириш истиқболлари муҳокама қилинди.

Эришилган келишувлар Ўзбекистоннинг заргарлик брендларини жаҳон бозорига илгари суришнинг янги босқичини бошлаб берди ҳамда тажриба алмашиш, ҳамкорлар ва инвестицияларни жалб этиш учун қулай шароит яратади.