Ўзбекистон ва Сурия савдо ва инвестиция ҳамкорлигини кенгайтириш масалаларини муҳокама қилмоқда

Тошкент, Ўзбекистон (UzDaily.uz) — Сурия Ўзбекистоннинг Яқин Шарқдаги экспорт ҳажмини кенгайтириш ва инвестициявий ҳамкорликни ривожлантириш бўйича истиқболли йўналишлардан бирига айланмоқда.

Мазкур масалалар ИССВ раҳбари Л. Кудратов ҳамда Сурия Араб Республикаси Савдо-саноат палатаси раиси Алаа Умар Алали ўртасидаги учрашувда асосий мавзу бўлди.

Қайд этилишича, ўзаро савдо барқарор ижобий суръатда ривожланмоқда: 2017-2025 йиллар давомида товар айирбошлаш ҳажми қарийб 5 баробарга ошган. Шу билан бирга, мавжуд кўрсаткичлар икки томонлама ҳамкорлик салоҳиятини тўлиқ акс эттирмаслиги таъкидланди.

Устувор йўналишлар сифатида Сурияда Ўзбекистон савдо уйини ташкил этиш, логистика инфратузилмасини ривожлантириш, ҳукуматлараро комиссияни шакллантириш, “Made in Uzbekistan” ва “Made in Syria” форматларида мунтазам кўргазмалар ўтказиш ҳамда Ўзбекистон–Сурия бизнес кенгашини тузиш белгиланди.

Шунингдек, шартномалар номенклатурасини кенгайтириш, Ўзбекистоннинг фармацевтика ва озиқ-овқат маҳсулотлари, жумладан қайта ишланган товарлар экспортини ошириш, шунингдек Сурия зайтун мойи импортини кўпайтириш масалалари муҳокама қилинди.

Савдо, божхона тартиб-таомиллари, карантин ва фитосанитария талаблари ҳамда инвестицияларни ўзаро ҳимоя қилиш бўйича битимларни тайёрлашга алоҳида эътибор қаратилди.