Ўзбекистон ва Қувайт бизнес форуми ва ҳукуматлараро музокаралар орқали иқтисодий ҳамкорликни мустаҳкамламоқда

Тошкент, Ўзбекистон (UzDaily.uz) — 13–15 декабрь кунлари Ўзбекистон Республикаси Инвестициялар, саноат ва савдо вазири Лазиз Кудратов амалий ташриф билан Қувайт Давлатида бўлди. Ташриф дастури доирасида Қувайт ҳукумати вакиллари, ишбилармон доиралар ва молиявий институтлар билан музокаралар ўтказилди, шунингдек Ўзбекистон–Қувайт Ҳукуматлараро қўшма комиссиясининг 2-йиғилиши бўлиб ўтди.

Қувайт нефть вазири ва Куваит Петролеум Сорпоратион раиси Тареқ Сулеиман Ал-Роуми ҳамда савдо ва саноат вазири Халифа Ал-Аскар билан учрашувлар ўтказилди. Музокараларда нефть-газ ва нефть-кимё соҳаларида ҳамкорлик, логистика ва савдо, Ўзбекистон авиакомпаниялари учун авиация ёқилғисини етказиб бериш, мева-сабзавот маҳсулотлари экспортини кенгайтириш, шунингдек стандартларни ўзаро тан олиш ва лабораторияларни аккредитация қилиш масалалари муҳокама қилинди.

Қувайт Давлатининг электроэнергетика, сув ресурслари ва қайта тикланувчи энергетика вазири, молия вазири вазифасини бажарувчи ҳамда иқтисодий масалалар ва инвестициялар бўйича вазир вазифасини бажарувчи доктор Сабиҳ Абдулазиз Ал-Муҳайзим билан бўлиб ўтган учрашувда инвестициявий ҳамкорликни чуқурлаштириш, икки томонлама савдони кенгайтириш, шунингдек “Форс кўрфази мамлакатлари – Марказий Осиё” Тараққиёт жамғармасини ташкил этиш ташаббуси ва бошқа ўзаро манфаатли ҳамкорлик йўналишлари муҳокама қилинди.

Ўзбекистон–Қувайт Ҳукуматлараро қўшма комиссиясининг 2-йиғилиши доирасида эришилган келишувларни амалий жиҳатдан илгари суриш ва ҳамкорликни янада ривожлантиришга ўзаро қизиқиш тасдиқланди.

Шунингдек, Ўзбекистон–Қувайт бизнес-форуми ва “Made in Uzbekistan” кўргазмасида иштирок этилди. Сўнгги беш йил ичида икки томонлама товар айирбошлаш ҳажми беш баробардан ортиқ ошгани қайд этилди. Ҳамкорликнинг истиқболли йўналишлари сифатида агросаноат мажмуаси, нефть-кимё, инфратузилма, транспорт ва логистика, рақамли ҳамда молиявий хизматлар белгиланди.

Электрон тижорат, исломий молия, қурилиш, саноат ва соғлиқни сақлаш соҳаларида Қувайт ишбилармон доиралари билан учрашувлар ўтказилди. Ташриф якунида иқтисодий шерикликни янада чуқурлаштириш учун мустаҳкам асос яратган қатор икки томонлама ҳужжатлар имзоланди.