Ўзбекистон ва Канада парламентлараро ҳамкорлиги янги босқичга чиқмоқда

Тошкент, Ўзбекистон (UzDaily.uz) — 

2025 йил 25–27 ноябрь кунлари Олий Мажлис Сенати Раисининг биринчи ўринбосари Содиқ Сафоев бошчилигидаги Ўзбекистон делегациясининг Канадага расмий ташрифи амалга оширилди.

27 ноябрь куни Ўзбекистон делегацияси Канада пойтахти Оттава ва Торонто шаҳарларида бир қатор учрашувлар ўтказди.

Канада парламенти биносида “Ўзбекистон кунлари” ҳамда “Янги Ўзбекистон: Шавкат Мирзиёев йўли” китобининг тақдимоти бўлиб ўтди. Тақдимот тадбирида парламент аъзолари, давлат идоралари вакиллари, йирик компаниялар, бизнес уюшмалари, экспертлар ва журналистлардан иборат 80 дан ортиқ иштирокчи қатнашди.

Канадалик сиёсий доиралар вакиллари Ўзбекистонда амалга оширилаётган кенг кўламли ислоҳотларни юксак баҳолади. Кейинги йилларда Президент Шавкат Мирзиёевнинг очиқ ва конструктив ташқи сиёсати туфайли икки давлат ўртасида ҳамкорлик жадал ривожланиб бораётгани алоҳида қайд этилди.

Учрашувларда икки давлат элчихоналарини ташкил этиш жараёнини тезлаштириш масаласи ҳам муҳокама қилинди. Шунингдек, 2026 йилда Самарқандда биринчи “Ўзбекистон–Канада” парламент форумини ўтказиш таклифи қўллаб-қувватланди. Канада парламенти Сенатида эса Ўзбекистонда “Канада куни”ни ташкил этиш таклифи илгари сурилди.

Шу билан бирга, делегация Канада парламенти Сенати Спикери Раймонде Ганье ва Жамоалар палатаси Спикери Френсис Скарпаледжа билан ҳам мулоқот ўтказди.

Р. Ганье Ўзбекистонда олиб борилаётган ислоҳотлар ҳақида ўзининг ижобий фикрларини билдириб, Оттавада Ўзбекистон элчихонаси очилишини тўлиқ қўллаб-қувватлади. Ф. Скарпаледжа эса икки парламент ўртасидаги алоқалар фаоллашиб бораётгани, айниқса Самарқандда ўтказилиши режалаштирилаётган форумда Канада тадбиркорлари делегациясининг иштироки муҳимлигини таъкидлади.

Шунингдек, делегация аъзолари парламент дўстлик гуруҳи раиси Зиад Абуолтаиф ва аъзолар билан учрашувда миграция, иқтисодиёт ва маданий алоқалар масалаларини муҳокама қилди. Канадада истиқомат қилаётган 60 мингдан ортиқ ўзбекистонлик диаспоранинг ижобий ҳиссаси алоҳида қайд этилди. Канада соғлиқни сақлаш тизимида тиббиёт ходимларига эҳтиёж юқори бўлиб, бу борада Алберта ва Онтарио провинциялари билан музокаралар олиб борилаётгани таъкидланди.

Канада парламенти сенаторлари билан бўлиб ўтган учрашувларда Ўзбекистонда жамоат хавфсизлиги, шаҳарсозлик ва диний бағрикенглик борасидаги ислоҳотлар юксак баҳоланди, шунингдек, мамлакатимизнинг инвестицион очиқлиги канадалик тадбиркорлар учун янги имкониятлар яратгани қайд этилди.