Ўзбекистон ва Европа Иттифоқи энергетика соҳасидаги стратегик шерикликни мустаҳкамламоқда.

Тошкент, Ўзбекистон (UzDaily.uz) — Энергетика вазирлиги матбуот хизматининг хабар беришича, Ўзбекистон ва Европа Иттифоқи ўртасидаги энергетика соҳасидаги ҳамкорлик янги босқичга қадам қўймоқда.

Эришилган тарихий келишувлар доирасида етакчи Европа компанияларидан тўғридан-тўғри инвестициялар ва илғор технологиялар мамлакатга кириб келади. Ҳозирги кунда барча йўналишлар қатори энергетика соҳасида ҳам Европа компаниялари, хусусан, “Сиеменс Энергй”, «ЭДФ», «Вольталиа», “Тотал Энергиес” компаниялари юртимиз генерация қувватлари лойиҳаларида фаол иштирок этмоқда.

Янги лойиҳаларни оладиган бўлсак, Бельгиянинг Брюссел шаҳрида бўлиб ўтган “Глобал Гатевай” форуми доирасида Ўзбекистон, Қозоғистон ва Қирғизистон Энергетика вазирликлари ҳамда Европа тикланиш ва тараққиёт банки ва Европа инвестиция банки ўртасида “Қамбарота ГEС-1” лойиҳасини молиялаштириш бўйича англашув меморандумлари имзоланди.

Жумладан, ушбу англашув меморандумлари Европа тикланиш ва тараққиёт банки билан 500 млн долларлик, Европа инвестиция банки билан эса 200 млн долларлик маблағлар ажратишни назарда тутади ва мазкур келишувлар бўйича ишлар бошлаб юборилди.

Бундан ташқари, Европанинг бошқа молия институтлари билан ишлар бошланди. Хусусан, янги имзоланган келишув доирасида электр тармоқларини модернизация қилиш бўйича Европа компаниялари ва бошқа етакчи молия институтлари билан ишлар ташкил қилишга келишиб олинди.

Бу лойиҳалар эса, ишлаб чиқарилган электр энергиясини кам йўқотишларсиз истеъмолчиларга етказиб беришга хизмат қилади.

Шунингдек, Италиянинг етакчи “Пиетро Фиорентини” компанияси билан ҳамкорликда газ тақсимлаш тизимларини модернизация қилиш, йўқотишларни камайтириш ва ушбу тизимлардан самарали фойдаланиш бўйича ҳамкорлик қилишга келишиб олинди.

Ҳозирги кунда Германиянинг «Линде» компанияси билан «Навоиязот» АЖда ҳавони тақсимлаш қурилмасини қуриш бошланяпти. Бу «Линде» компаниясининг Ўзбекистонга биринчи тўғридан-тўғри инвестицияси ҳисобланади.

Умуман олганда, ушбу йирик компаниялар билан ҳамкорлик келишувлари уларнинг Ўзбекистонга бўлган ишончи ва узоқ муддатли ҳамкор бўлишига тайёрлигини билдиради.