Тошкент, Ўзбекистон (UzDaily.uz) — 2025 йил 14 август куни Ўзбекистон Республикаси Инвестициялар, саноат ва савдо вазири ўринбосари Акрам Алиев «CLAAS » компаниясининг Шарқий Европа бўйича вице-президенти Михаил Баер билан музокаралар ўтказди. Учрашувда шунингдек UzCLAAS Agro компанияси вакиллари иштирок этди.

Томонлар қишлоқ хўжалиги техникаси ишлаб чиқаришни йўлга қўйишга тайёргарлик масалаларини кўриб чиқди, техник мувофиқлаштириш, ишлаб чиқариш инфратузилмасини ривожлантириш ва маҳаллийлаштириш чора-тадбирларини муҳокама қилди. Шунингдек, агро-машинасозлик соҳасида ҳамкорлик истиқболлари ва 2026 йил учун режалаштирилган ишлаб чиқариш ҳажмларига алоҳида эътибор қаратилди.

Эришилган келишувлар Ўзбекистоннинг саноат салоҳиятини мустаҳкамлаш, технологик имкониятларини кенгайтириш ҳамда қишлоқ хўжалиги техникаси ишлаб чиқаришда жаҳон етакчиларидан бири билан стратегик ҳамкорликни ривожлантиришга қаратилган.