Ўзбекистон терма жамоаси Дубайдаги халқаро футбол турнирида иштирок этади

Тошкент, Ўзбекистон (UzDaily.uz) — Ўзбекистон футбол терма жамоаси ноябрь ойида ФИФА кунлари доирасида Бирлашган Араб Амирликларининг Дубай шаҳрида бўлиб ўтадиган халқаро ўртоқлик турнирида иштирок этади. Бу ҳақда Ўзбекистон футбол ассоциацияси маълум қилди.

Турнирда жаҳон чемпионатида иштирок этган тўрт жамоа — Ўзбекистон, Эрон, Миср ва Кабо-Верде терма жамоалари ўйнайди.

13 ноябрь куни Эрон ва Кабо-Верде жамоалари ўзаро баҳс олиб боришади, 14 ноябрда эса Ўзбекистон терма жамоаси Мисрга қарши майдонга тушади.

Ўйинлар натижаларига кўра, ютқазган жамоалар 17 ноябрда учинчи ўрин учун беллашади, ғолиблар эса 18 ноябрда финалда тўқнаш келади.

Барча учрашувлар “Ал-Мактум” стадионида бўлиб ўтади. У «Ал-Наср» клубига тегишли бўлиб, ўйинлар Тошкент вақти билан соат 22:00 да бошланади.