Ўзбекистон Ташқи ишлар вазири Яқин Шарқдаги вазиятни муҳокама қилди

Тошкент, Ўзбекистон (UzDaily.uz) — 12 март куни Ўзбекистон Ташқи ишлар вазири Бахтиёр Саидов Бирлашган Араб Амирликлари, Қувайт, Саудия Арабистони Қироллиги, Қатар давлати ва Уммон Султонлигининг мамлакатда аккредитациядан ўтган дипломатик ваколатхоналари раҳбарлари билан учрашди.

Музокаралар давомида томонлар Яқин Шарқдаги мавжуд вазият бўйича фикр алмашдилар. Иштирокчилар минтақавий хавфсизликка таҳдид солиши мумкин бўлган воқеалар ҳақида хавотир билдирдилар ва вазиятнинг янада кескинлашишига йўл қўймаслик зарурлигини таъкидладилар.

Можароларни ҳал қилиш фақат дипломатик воситалар орқали ва халқаро ҳуқуқ асосида амалга оширилиши кераклиги таъкидланди.

Бундан ташқари, учрашув иштирокчилари Ўзбекистон ва Форс кўрфази араб давлатлари ўртасида икки томонлама ва кўп томонлама ҳамкорликни янада ривожлантириш истиқболларини муҳокама қилишди.

“Марказий Осиё – Форс кўрфази ҳамкорлик кенгаши” форматидаги ўзаро ҳамкорликни кенгайтиришга алоҳида эътибор қаратилди.