Ўзбекистон Қурилиш вазирлиги Хитой қурилиш соҳасидаги янгиликларни ўрганмоқда

Тошкент, Ўзбекистон (UzDaily.uz) — Шу кунларда Қурилиш ва уй-жой коммунал хўжалиги вазири ўринбосари Давронжон Адилов бошчилигидаги делегация Хитой Халқ Республикасида хизмат сафарида бўлиб турибди.

Сафар доирасида делегация "China CHoal Industry Engineering Chongqing Design Research Institute (Group)" CHo., Ltd. билан учрашув ўтказди.

Мазкур институт 1953 йилда ташкил этилган бўлиб, бугунги кунда Хитойдаги йирик комплекс муҳандислик ва лойиҳалаш ташкилотларидан бири ҳисобланади.

70 йиллик фаолияти давомида у анъанавий тармоқ институтидан замонавий, рақамлаштирилган ва интеграциялашган муҳандислик ечимларини таклиф этувчи компанияга айланган.

Ташкилот таркибида бир нечта шўба корхоналар, ихтисослашган институтлар ва марказлар фаолият юритиб, 1 800 нафардан ортиқ мутахассисни бирлаштиради.

Компания архитектура, коммунал хўжалик, энергетика ва экологик йўналишларда 50 дан ортиқ юқори тоифали лицензияларга эга бўлиб, Хитойнинг 30 дан зиёд ҳудудларида ҳамда 20 дан ортиқ давлатлар билан ҳамкорлик алоқаларини йўлга қўйган.

Учрашув давомида қурилиш соҳасида рақамлаштириш, жумладан, БИМ технологияларини жорий этиш, «яшил» энергетика, экологик барқарорлик ва муҳандислик хизматларини комплекс тарзда ташкил этиш масалалари муҳокама қилинди.

Хусусан, компания томонидан амалга оширилган йирик ижтимоий лойиҳалардан бири — "Jingshuang Districht Hospital of Chongqing Shapingba Districht People’s Hospital" мисолида замонавий ёндашувлар тақдим этилди.

Мазкур шифохона лойиҳасида қурилишнинг илк босқичиданоқ БИМ технологияси қўлланилиб, барча йўналишлар бўйича уч ўлчамли моделлаштириш, муҳандислик тармоқларини мувофиқлаштириш ва эҳтимолий зиддиятларни олдиндан бартараф этиш имкони яратилган.

Шунингдек, қурилиш жараёнида «ақлли» тизимлар жорий қилиниб, бинони автоматлаштириш ва тиббий инфратузилмани рақамли бошқариш йўлга қўйилган.

Мазкур тажриба қурилиш соҳасида инновацион ёндашувларни кенг жорий этиш, лойиҳалаш ва қурилиш жараёнларининг самарадорлигини оширишда муҳим аҳамият касб этиши таъкидланди.