Тошкент, Ўзбекистон (UzDaily.uz) — Ўзбекистон Республикаси Президенти Шавкат Мирзиёев Хотира ва қадрлаш куни, шунингдек, Иккинчи жаҳон урушида қозонилган Ғалабанинг 80 йиллиги муносабати билан халқимизга табрик йўллади.

Давлат раҳбари ўз табригида Улуғ Ғалабанинг тарихий аҳамияти, қаҳрамон аждодлар хотирасига чуқур эҳтироми ва бугунги кунда ҳаёт бўлган фронт ва меҳнат фахрийларига миннатдорлигини изҳор этди.

«Бу — ҳақиқий жасорат ва қаҳрамонлик солномаси бўлиб, унинг улуғворлиги вақт домида ҳам забун бўлмайди. Биз шонли ғалабага муносиб ҳисса қўшган собитқадам халқимиз билан ҳақли равишда фахрланамиз», — дея таъкидлади Президент.

Уруш йилларида республикада яшаган қарийб 6,8 миллион аҳолидан 2 миллионга яқини фронтга жўнаб кетганини, улардан ярим миллиондан ортиғи ҳалок бўлганини, 50 мингдан зиёди концлагерларда қурбон бўлганини, минглаб инсонлар ногирон ҳолда қайтганини эслатиб ўтди. Ўзбекистонликлар ҳиссаси юзлаб мукофотлар билан эътироф этилган: 301 нафар юртдошимиз Совет Иттифоқи Қаҳрамони, 70 нафардан ортиғи Шон-шараф ордени тўлиқ кавалери унвонига сазовор бўлган.

Президент фронт ортидаги жасорат ҳақида алоҳида тўхталиб ўтди:

«Уруш йилларида Ўзбекистон фронт учун ишончли таянчга айланган — 171 та завод эвакуация қилинган, 280 та янги корхона барпо этилган, шу билан бирга республика 1,5 миллионга яқин эвакуация қилинган фуқарони, жумладан 250 минг болани самимийлик билан қабул қилган ва бошпана берган».

Шавкат Мирзиёев авлодлар ўртасидаги боғлиқлик ҳақида сўз юритар экан, аждодлар қаҳрамонлигини ёдда сақлаш ва ёшларимизни ватанпарварлик руҳида тарбиялаш муҳимлигини алоҳида таъкидлади. Бу борада «Ғалаба боғи», «Ватанпарварлар» боғлари, ҳамда «Миллат фидойилари» ёдгорлик мажмуаси каби рамзий иншоотлар барпо этилган бўлиб, уларда юзлаб Ватан ҳимоячилари номи олтин ҳарфлар билан муҳрланган.

Президент давлатнинг фахрийларга кўрсатаётган эътиборини ҳам қайд этди:

«Ғалабанинг 80 йиллиги муносабати билан ҳар бир уруш қатнашчиси ва ногиронига 10 минг АҚШ доллари миқдорида бир марталик пул мукофоти, меҳнат фронти иштирокчилари ва тенглаштирилган тоифаларга моддий ёрдам ва юбилей медаллари топширилди. Шунингдек, уларга тиббий ва ижтимоий хизматлар, санаторийларда даволаниш имкониятлари яратилмоқда».

«Биз бу буюк инсонлар олдида ҳамиша қарздормиз. Улар ҳаётини аямаган ҳолда бугунги тинчлик ва эркинлик учун кураш олиб боришган», — деди Президент Мирзиёев.

Сўнгги сўзларида у барча фуқароларни самимий табриклаб, осойишталик, фаровонлик ва саодат тилади:

«Юртимизда ҳамиша тинчлик ва хотиржамлик ҳукмрон бўлсин, халқимиз бахтли яшасин!»