Ўзбекистон Марказий банки веб-сайтлардаги қоидабузарликлар учун 18 та банкка жаримага тортди

Тошкент, Ўзбекистон (UzDaily.uz) — Ўзбекистон Республикаси Марказий банки жорий йил сентябрь–октябрь ойларида тижорат банкларининг расмий веб-сайтларига мониторинг ўтказди. Мониторингнинг мақсади — банк хизматларидан фойдаланувчиларнинг тўлиқ, ишончли ва тенг даражада ахборот олиш ҳуқуқини қўллаб-қувватлашдир.

Мониторинг натижаларига кўра,айрим веб-сайтларда истеъмолчи учун зарур бўлган маълумотлар етарли даражада берилмагани аниқланди.

Хусусан, айрим банклар “Ўзбекистон Республикасининг давлат тили тўғрисида”ги Қонун талабларига риоя қилмаётгани маълум бўлди — уларнинг расмий веб-сайтларида давлат тилидаги маълумот йўқ эди.

Шунингдек, гаров мулкини кредит қарзи камайиши билан босқичма-босқич чиқариш тартиби эълон қилинмагани билан боғлиқ камчиликлар аниқланди. Бу ахборотни ошкор этишга оид қонунчилик талабларининг бузилиши ҳисобланади.

Қонунбузарлик ҳолатлари қуйидаги банкларнинг расмий веб-сайтларида қайд этилди:

Agrobank, Anor Bank, Hayot Bank, Universal Bank, Garant Bank, Asakabank, Turonbank, Infinbank, Mikrokreditbank, Trastbank, Madad Invest Bank, Soderot Bank, Orient Finans Bank, Ipoteka-bank, Tenge Bank, Ziraat Bank Uzbekistan, AVO Bank ва Open Bank.

Текширув якунларига кўра, Марказий банк амалдаги меъёрий ҳужжатларга мувофиқ ҳар бир банкка 102 миллион сўм миқдорида жарима санкциясини қўллади. Шу билан бирга, уларга аниқланган камчиликларни бартараф этиш ва расмий веб-сайтлардаги маълумотларни қонунчилик талабларига мослаштириш бўйича кўрсатмалар юборилди.

Марказий банк барча тижорат банкларидан қатъий равишда талаб қилди:

— истеъмолчилар учун ахборотни ошкор этишда “Ўзбекистон Республикасининг давлат тили тўғрисида”ги Қонун талабларига сўзсиз амал қилишни;

— расмий веб-сайтларда жойлаштирилаётган маълумотларнинг тўлиқлиги, ишончлилиги ва долзарблигини таъминлашни;

— расмий ресурсларда маълумотлар эълон қилинганда, истеъмолчиларнинг тушунарли ва тўлиқ маълумот олиш ҳуқуқини инобатга олишни.