Тошкент, Ўзбекистон (UzDaily.uz) — Авиадиспетчерларини тайёрлашда БААнинг GANS ўқув маркази билан ҳамкорлик йўлга қўйилди. Бу ҳақда Республика Транспорт вазирлиги матбуот хизмати хабар берди.

GANS — авиадиспетчерлар ва аэронавигация мутахассисларини тайёрлашга ихтисослашган, илғор технологиялардан фойдаланган ҳолда юқори даражадаги касбий тайёргарликни таъминловчи етакчи ўқув марказидир.

Халқаро ҳамкорликни ривожлантириш доирасида «Узаэронавигация» Маркази ДУК делегацияси Абу-Дабидаги GANS ўқув марказига ташриф буюрди. Ташриф давомида Марказ вакиллари ўқув жараёнини ташкил этиш ва авиадиспетчерларни ўқитишнинг илғор усуллари билан яқиндан танишди.

Учрашув натижасида ҳамкорлик меморандуми, шунингдек, икки томонлама ҳамкорликни янада ривожлантириш тўғрисидаги битим имзоланди.