Тошкент, Ўзбекистон (UzDaily.uz) — Жорий йилнинг 15-18 апрель кунлари Инвестициялар, саноат ва савдо вазири ўринбосари Илзат Касимов бошчилигидаги делегация Улан-Баторга (Мўғулистон) ташриф буюрди.

Ташриф давомида Йўл ва транспорт вазирлиги, Ташқи ишлар вазирлиги, Озиқ-овқат, қишлоқ хўжалиги ва енгил саноат вазирлиги, Иқтисодий ривожланиш вазирлиги, Маданият, спорт, туризм ва ёшлар вазирликлари, Саноат ва минерал ресурслар вазирликлари, Мўғулистон Миллий савдо палатаси раҳбарлари билан учрашувлар бўлиб ўтди.

Учрашувларда юқори ва олий даражадаги режалаштирилган тадбирларга тайёргарлик кўриш, жорий йилнинг февраль ойида бўлиб ўтган Ўзбекистон ва Мўғулистон ҳукуматлараро комиссиясининг биринчи йиғилишида эришилган келишувларни амалга оширишни жадаллаштириш, Мўғулистон билан стратегик шерикликни мустаҳкамлаш, савдо, транспорт ва логистика соҳасидаги ҳамкорликни ривожлантириш масалалари муҳокама қилинди.