Тошкент, Ўзбекистон (UzDaily.uz) — Ўзбекистонда 2030 йилга қадар иссиқлик таъминоти тизимидаги субсидиялар босқичма-босқич бекор қилиниб, бу соҳада давлат томонидан кўрсатиладиган қўллаб-қувватлаш тўлиқ тугатилади.

Бу ҳақда 8 июль куни Ахборот ва оммавий коммуникациялар агентлигида ўтказилган матбуот анжуманида давлат унитар корхонаси «Иссиқликтаъминоти» бош директори Илҳом Тураев маълум қилди.

Унинг таъкидлашича, ҳозирги кунда Тошкент ва ҳудудларда аҳоли иссиқ сув ва иссиқлик таъминоти хизматларидан имтиёзли тарифлар бўйича фойдаланмоқда. Истеъмолчилар учун белгиланган нарх билан хизматларнинг бозордаги ҳақиқий қиймати ўртасидаги фарқ давлат бюджети ҳисобидан қопланади.

«Иссиқлик таъминоти соҳасини барқарор ривожлантириш учун субсидия тизимидан воз кечиш зарур. Бир вақтнинг ўзида буни амалга ошириш мумкин эмас. Биз 2030 йилгача дотациялардан тўлиқ воз кечиш сари ҳаракат қилмоқдамиз. Бу учун тарифларни йилда бир ёки икки марта қайта кўриб чиқиш талаб этилади. Нархларни кескин кўтариш аҳоли фаровонлигига жиддий таъсир кўрсатиши мумкин», — деди Илҳом Тураев.

Унинг сўзларига кўра, бюджет қўллаб-қувватлаш ҳажми босқичма-босқич қисқартирилади. Бозор механизмларига ўтиш ҳам аста-секин амалга оширилади, бу эса аҳолига тушадиган юкни камайтириш ва шу билан бирга иссиқлик таъминоти корхоналарининг барқарор фаолиятини таъминлашга ёрдам беради.