Ўзбекистон 2025 йилги Глобал Инновациялар индексида 79-ўринга кўтарилди

Тошкент, Ўзбекистон (UzDaily.uz) — 2025 йил учун (Global Innovation Index, GII)  сўнгги ҳисоботида Ўзбекистон дунёнинг 139 та мамлакат орасида 79-ўринни эгаллади. Бу мамлакатимизнинг сўнгги 9 йилда 43 поғонага юқори кўтарилганини англатади.

Ўзбекистон қуйи ва ўрта даромад гуруҳида Ветнам, Марокаш, Мўғулистон ва бошқа 37 та мамлакат ўртасида 7-ўриндан ҳамда Марказий ва Жанубий Осиё минтақасида 10 та мамлакат ичида Ҳиндистон ва Эрондан кейин 3-ўриндан жой олди.

Рейтингда инновацияларга йўналтириладиган сармоя ва ресурслар ((innovation input) субиндексида 69-ўрин  ва инновацияларнинг натижадорлиги ((innovation output) субиндексида 92-ўринни эгаллади.

Мамлакатлар 2025 йилги рейтингда 78 та индикатор бўйича баҳоланди. Шунга кўра, Ўзбекистон учун 36 та индикаторда позиция яхшиланди, 7 тасида эса 2024 йилги натижа сақлаб қолинди.

GII йўналишларининг 4 тасида жумладан, “инсон капитали ва илмий тадқиқотлар”  «инфратузилма», “бозор ривожланиши”, “билим ва технология маҳсуллари”да позициялар яхшиланди.

Республикамизнинг икки олий таълим муассасаси – Тошкент ирригация ва қишлоқ хўжалигини механизациялаш муҳандислари Миллий тадқиқот университети ҳамда Мирзо Улуғбек номидаги Ўзбекистон Миллий университетининг QS жаҳон университетлар рейтингидаги натижалари GII рейтингида акс эттирилгани натижасида “QS рейтинги бўйича энг юқори 3талик университетларнинг ўртача баҳоси” индикатори 11 поғонага яхшиланиб 64-ўринга кўтарилди.

GIIнинг 2025 йил рейтинг ҳисоботида 35 та индикаторда ўсиш тенденциялари қайд этилди, шулардан 10 тасида энг юқори ўсиш кузатилди. Хусусан, юқори технологиялар экспорти кўрсаткичида 14 поғона, Стартап ва скайлапларни молиялаштириш кўрсатгичида 13 поғона, Интеллектуал мулкдан келадиган тушумлар кўрсаткичида 17 поғона, Янги бизнеслар/Юникорнлар баҳоси кўрсатгичида 13 поғона, Кретив товарлар экспорти кўрсаткичида 11 поғона, Олий таълим муассасаларига қабул қилиш кўрсатгичида 20 поғона ҳамда Таълим учун давлат ҳаражатлари кўрсатгичида 10 поғона юқориланди.

Глобал инновация индекси рейтинги глобал тадқиқот ва инновацион ривожланиш бўйича дунё мамлакатлари фаолиятини баҳолайдиган етакчи тадқиқот ҳисобланади ҳамда 2 та субиндекс ва 7 та йўналиш гуруҳига бирлаштирилган 80 га яқин индикаторни ўз ичига олади.

Ўзбекистон GII рейтингига илк бор 2015 йилда қўшилган. Бу мамлакатимизнинг сўнгги 9 йилда 43 поғонага юқори кўтарилганини англатади.