Ўзатом MVM EGI Zrt билан Венгриянинг Ўзбекистон атом электр станциясида иштирок этишини муҳокама қилди

Тошкент, Ўзбекистон (UzDaily.uz) — «Ўзатом» агентлигида Агентлик директори ҳамда Венгриянинг MVM EGI Zrt компанияси бош директори Петер Карпати билан Ўзбекистон Республикаси ҳудудида интеграциялашган атом электр станциясини қуриш лойиҳасида Венгрия томонининг иштироки масалалари юзасидан музокаралар бўлиб ўтди.

Учрашув давомида томонлар Венгрия Эксимбанки томонидан экспорт молиялаштиришини жалб этиш имкониятлари, лойиҳани молиялаштиришни ташкил этишнинг жорий ҳолати, шунингдек, "қуруқ совутиш" тизимларини жорий этиш лойиҳасини амалга ошириш бўйича тўрт томонлама асосий битимни имзолаш истиқболларини муҳокама қилдилар.

Музокаралар Ўзбекистон Республикаси ва Венгрия ўртасида атом энергиясидан тинч мақсадларда фойдаланиш соҳасидаги ҳамкорликнинг юқори даражасини, илғор технологияларини алмашиш ва йирик миллий инфратузилма лойиҳаларини амалга ошириш учун халқаро молиявий воситалардан биргаликда фойдаланишга тайёрлигини тасдиқлади.

Лойиҳанинг самарали ривожланишини таъминлаш, узоқ муддатли халқаро ҳамкорликни мустаҳкамлаш ва Ўзбекистон атом саноатига инновацион юқори технологик ечимларни жорий этиш мақсадида лойиҳанинг барча иштирокчилари фаолиятини мувофиқлаштириш масалаларига алоҳида эътибор қаратилди.

Учрашув якунида 2026 йил январь ойида Венгрияда «Ўзатом» агентлиги делегациясининг расмий ташрифи доирасида Венгрия Эксимбанки, OTP Bank ва Венгрия томонининг бошқа асосий молиявий ва идоравий тузилмалари вакиллари иштирокида музокараларнинг навбатдаги босқичини ўтказиш тўғрисида келишувга эришилди.