«Ўзатом» делегацияси “Ansaldo Energia” компанияси билан Ўзбекистонда биринчи атом электр станциясини қуриш бўйича ҳамкорликни муҳокама қилди

Тошкент, Ўзбекистон (UzDaily.uz) — «Ўзатом» агентлиги директори Азим Ахмедхаджаев бошчилигидаги делегация 20-22 октябрь кунлари амалий ташриф билан Генуя шаҳрида (Италия) бўлиб турибди.

Ташриф дастуридан бир қатор ишбилармонлик музокаралари, жумладан, Лигурия минтақаси раҳбари, Генуя администрацияси, Савдо палатаси, технологик олий ўқув юртлари ва Италия энергетика сектори компаниялари вакиллари билан учрашувлар ўрин олган.

Хусусан, 20 октябрь куни Ansaldo Energia холдинги ва унинг атом энергетикаси технологияларига ихтисослашган компанияларидан бири – Ansaldo Nucleare раҳбарияти билан учрашув бўлиб ўтди. Холдинг Европа энергетика секторида энергия ускуналарини, шу жумладан буғ ва газ турбогенераторларини лойиҳалаш, муҳандислик, ишлаб чиқариш ва етказиб бериш билан шуғулланувчи етакчи ўйинчи ҳисобланади.

Кун тартибидан – Ўзбекистонда биринчи атом электр станциясини қуриш лойиҳасини амалга оширишда технологик интеграция ва италиялик ҳамкорларнинг ёрдамчи тизимлари ечимларини Ўзбекистон иқлим шароитига мослаштириш бўйича ҳамкорликни ривожлантириш масалалари ўрин олган.

Италия томони хавфсизлик тизимларини яратиш ва улар учун дастурий таъминотни ишлаб чиқиш, атом электр станциялари учун асосий ва ёрдамчи ускуналарни етказиб бериш бўйича катта тажрибага эгалиги, шунингдек, Хитой, Бельгия, Словения, Венгрия ва Украина каби мамлакатларда АЭСларни баҳолаш ва уларга техник хизмат кўрсатиш билан бир қаторда ишлатилган ядро ёқилғиси билан ишлашда юқори профессионаллик тўғрисида сўзлаб берди.

Холдинг компанияларини Ўзбекистонда АЭС қурилиши лойиҳасини амалга оширишни назорат қилиш, шунингдек, самарали ёрдамчи ечимларни ишлаб чиқиш учун техник маслаҳатчилар сифатида жалб қилиш имкониятлари муҳокама қилинди.

Ansaldo Nucleare компаниясининг ўз ишланмаси бўлган ишлатилган ядро ёқилғисини бошқариш тизимларини олиш имконияти билан радиоактив чиқиндилар билан ишлаш соҳасида компания билан ўзаро ҳамкорлик қилиш хусусиятлари батафсил ўрганилди.

Шу билан бирга, Италия томони миллий норматив-ҳуқуқий базани шакллантириш ва лицензиялаш бўйича маслаҳат фаолиятини амалга ошириш, шунингдек, икки мамлакат манфаатлари йўлида атом соҳасида технологияларни доимий равишда такомиллаштириш ва кадрлар тайёрлаш мақсадида қўшма илмий-тадқиқот ва тажриба-конструкторлик ишларини (ИТТКИ) ташкил этишга қизиқиш билдирди.