Тошкент, Ўзбекистон (UzDaily.uz) — Ўзбекистон Республикаси Президенти Шавкат Мирзиёев «Халқаро углерод бирликлари бозорида иштирок этиш чора-тадбирлари тўғрисида»ги фармонни имзолади.

Ушбу ҳужжат орқали Ўзбекистоннинг Париж келишувининг 6-моддасида назарда тутилган ҳамкорлик механизмлари доирасида халқаро углерод бирликлари (ITMO) муомаласи тизимида иштирок этишининг ҳуқуқий ва институционал механизми белгиланди.

Париж келишувининг мазкур моддаси мамлакатларга иссиқхона газлари чиқиндиларини қисқартириш бўйича чораларни биргаликда амалга ошириш, шунингдек, эришилган халқаро натижалардан (ITMO) Миллий аниқланган ҳиссалар (NDC) доирасидаги мажбуриятларни бажариш учун фойдаланиш имкониятини беради.

Фармонга мувофиқ, Ўзбекистонда углерод бирликлари билан амалга ошириладиган операцияларда иштирок этиш учун субъектларни қабул қилиш тартиби жорий этилади, уларни тақсимлаш тамойиллари белгиланади ҳамда давлат иштирокидаги лойиҳалар доирасида шакллантирилган ITMO’ларни сотиш механизмлари жорий қилинади. Шунингдек, мазкур жараёнларни тартибга солувчи норматив-ҳуқуқий ҳужжатларни ишлаб чиқиш вазифаси Вазирлар Маҳкамасига юклатилди.

Ўзбекистоннинг халқаро углерод бирликлари бозоридаги иштирокини тартибга солиш, назорат қилиш ва мувофиқлаштириш юзасидан ваколатлар ва вазифалар белгилаб берилди.

Иқтисодийот ва молия вазирлиги Париж келишувининг 6-моддасида назарда тутилган Барқарор ривожланишга кўмаклашиш механизмларини амалга оширишни мувофиқлаштириш учун ваколатли орган этиб тайинланди.

Ушбу вазирлик углерод бирликларини шакллантириш лойиҳаларини амалга ошириш ва уларни халқаро савдо платформаларида сотишни ташкил этиш вазифаларини бажаради.

2026 йилдан бошлаб Ўзбекистонда Миллий углерод бирликлари реестри яратилади. У ушбу иқлим активларини чиқариш, муомала ва сотиш билан боғлиқ барча операцияларни ҳисобга олувчи марказлашган восита бўлади.