Минабдаги мактабга берилган зарба АҚШ Ҳаво кучларининг КСИР базасига қарши операциясининг бир қисми бўлиши мумкин — ОАВ

Тошкент, Ўзбекистон (UzDaily.uz) — Reuters агентлигининг икки нафар номи ошкор этилмаган амалдорга таяниб хабар беришича, америкалик терговчилар Эрон жанубидаги бошланғич мактабга берилган зарба АҚШ томонидан амалга оширилган бўлиши мумкинлигини кўриб чиқмоқда.

Уларнинг маълумотларига кўра, ҳарбий экспертлар қизлар мактабига қилинган ҳужумга АҚШ қуролли кучлари алоқадор бўлиши эҳтимолини юқори деб баҳоламоқда, бироқ ҳозирча якуний хулосалар чиқарилмаган, тергов давом этмоқда.

Бундан аввал The New York Times газетаси таълим муассасасига берилган зарба яқинида жойлашган Ислом инқилоби посбонлари корпуси Ҳарбий-денгиз кучлари базасига қарши АҚШ Ҳаво кучлари операциясининг бир қисми бўлиши мумкинлигини хабар қилган эди. Нашр бу хулосани сунъий йўлдош суратлари таҳлилига асосланган ҳолда билдирган.

Минаб шаҳридаги «Шаджаре Тайебе» мактаби 28 февраль куни — АҚШ ва Исроилнинг Эронга қарши кенг кўламли ҳарбий кампанияси бошланган кунда ҳужумга учради. Сўнгги маълумотларга кўра, 171 нафар инсон ҳалок бўлган, уларнинг аксарияти болалардан иборат.

Теҳрон БМТ Инсон ҳуқуқлари бўйича Олий комиссари бошқармасини ушбу ҳужумни қоралашга чақирди. Россия Ташқи ишлар вазирлигининг расмий вакили Мария Захарова ғарб оммавий ахборот воситалари болаларнинг оммавий ҳалок бўлиши ҳақидаги маълумотларни катта даражада эътиборсиз қолдирганини таъкидлаб, ушбу ҳодисага муносабат билдирилмаганини «даҳшатли ҳолат» деб атади.

Сўнгги маълумотларга кўра, можаро давомида Эрон ҳудудида жойлашган олтита мактабга ҳужум қилинган.