Marriott International Ўзбекистонда яна тўртта янги меҳмонхона очишни режалаштирмоқда

Тошкент, Ўзбекистон (UzDaily.uz) — Marriott International, Inc. компанияси Ўзбекистондаги фаолиятини кенгайтириш ниятида эканини маълум қилди. Компания 2028 йилнинг охирига қадар мамлакатда тўртта янги меҳмонхона очишни режалаштирган. Marriott ўз фаолиятини Ўзбекистон бозорида 2020 йилда Courtyard by Marriott Tashkent меҳмонхонасини очиш орқали бошлагани ҳақида компания матбуот хизмати хабар берди.

Марказий ва Шарқий Европа ҳамда DACH минтақаси бўйича ривожланиш бўйича катта вице-президент Ивица Чачич таъкидлашича:

«Ўзбекистон туризм ва ишбилармонлик саёҳатлари учун Марказий Осиёдаги энг истиқболли йўналишлардан бирига айланмоқда. Биз бу бозорнинг улкан салоҳиятини кўрмоқдамиз ва кенгайиш режаларимиз мамлакатдаги юқори сифатли меҳмонхона хизматларига бўлган ортиб бораётган талабни акс эттиради. Биз Ўзбекистонда ўз портфелимиз кенгайиши орқали саёҳатчиларга жаҳон даражасидаги шароитларни таклиф этибгина қолмай, балки минтақанинг глобал харита доирасида муҳим туризм ва инвестиция марказига айланишига ҳам ҳисса қўшмоқдамиз».

Режалаштирилган лойиҳалар орасида — JW Marriott Hotel Tashkent, унинг очилиши 2025 йилнинг охиригача кутилмоқда.

287 та хонали бу меҳмонхона компаниянинг мамлакатдаги илк люкс (олий тоифали) объекти бўлади. У JW Marriott’нинг табиатдан илҳомланган, уйғунлик ва самимий меҳмондўстликка асосланган сервис тамойилларини намоён этади.

2028 йилда компания The Ritz-Carlton, Tashkent меҳмонхонасини очишни режалаштирмоқда. Унда 140 та нозик тарзда безатилган хоналар ва люкслар, эксклюзив The Ritz-Carlton Club хизмати ҳамда оригинал концепцияга эга учта ресторан фаолият кўрсатади.

Marriott шунингдек, ўрта тоифали (select-service) меҳмонхоналар сегментини ҳам ривожлантиришни мўлжалламоқда. 2026 йилда Fairfield by Marriott Tashkent номли замонавий 204 хонали меҳмонхона очилиши режалаштирилган бўлиб, у брендга хос минималистик дизайн билан ажралиб туради.

2027 йилда эса Aloft Tashkent дебют қилади — у 197 хонали бўлиб, бренд услубидаги замонавий жамоат масканлари билан ажралиб туради.

Marriott’нинг Ўзбекистондаги фаолиятини кенгайтириш режалари компаниянинг мамлакат туристик инфратузилмасини ривожлантиришга кўмак бериш ва уни Марказий Осиёдаги халқаро туризм ҳамда бизнес марказларидан бири сифатида мустаҳкамлашга бўлган интилишини яққол намоён этади.

Marriott International, Inc. (Nasdaq: MAR) — бош офиси АҚШнинг Мэриленд штатидаги Бетесда шаҳрида жойлашган бўлиб, дунё бўйлаб 143 давлат ва ҳудудда 30 дан ортиқ бренд остида 9 600 дан зиёд объектлар портфелига эга. Компания меҳмонхоналар, аппартаментлар, таймшерлар ва бошқа турар жой объектларини бошқариш, франчайзинг ва лицензиялаш билан шуғулланади.