Марказий Осиё мамлакатлари CITES саммити олдидан биологик хилма-хилликни муҳофаза қилиш бўйича ягона позицияга келишиб олдилар

Тошкент, Ўзбекистон (UzDaily.uz) — Марказий Осиё мамлакатлари вакиллари глобал CITES CoP20 конференцияси олдидан минтақанинг ноёб экотизимларини ҳимоя қилиш бўйича умумий стратегия ишлаб чиқдилар. Маслаҳатлашувлар 23 ноябрь куни БМТ Тараққиёт Дастури ва Миллий Экология Қўмитаси кўмагида бўлиб ўтди.

Унда тоғ ландшафтлари барқарорлиги, қор қоплони ва бошқа ноёб турларни муҳофаза қилиш бўйича минтақавий ҳамкорликнинг янги йўналишлари муҳокама қилинди.

Учрашувда тоғ, чўл ва дашт ҳудудларида экотизимлар барқарорлигини мустаҳкамлаш, табиий яшаш жойларини тиклаш, миграция йўлларини ҳимоя қилиш ва инсон — табиат ўртасидаги мувозанатни яхшилаш масалалари муҳокама қилинди.

Иштирокчилар минтақанинг ноёб ҳайвонлари — қор қоплони, сайғоқ, қулон ва бошқа турлар экотизимлар соғлигини кўрсатиб берувчи муҳим белгилар эканини қайд этиб, уларни асраш бўйича қўшма чораларни кучайтиришга келишди.

Йиғилишда GEF-9 доирасида амалга оширилиши кўзда тутилган минтақавий ташаббуслар ҳам тақдим этилди. Улар экоҳудудларни тиклаш, экокоридорлар яратиш, қўшни давлатлар ўртасида мониторинг ва маълумот алмашишни кучайтириш, ҳамда табиатни асраш жараёнларига жамиятни кенгроқ жалб этишни мақсад қилган.

Мулоқот иштирокчилари минтақанинг бўлажак CITES конференциясида умумий позициясини тақдим этишга тайёрлигини билдирдилар.

Томонлар экологик мажбуриятларни ўлчанадиган натижаларга эга аниқ лойиҳаларга айлантириш ниятларини таъкидладилар.