Люксембургда ЕИ – Ўзбекистон ҳамкорлик кенгашининг 18-йиғилиши бўлиб ўтади

Тошкент, Ўзбекистон (UzDaily.uz) — Европа Иттифоқи (ЕИ) ва Ўзбекистон ўртасидаги ҳамкорлик кенгашининг 18-йиғилиши сейшанба, 21 октябрь куни Люксембург шаҳрида бўлиб ўтади.

Йиғилишга Европа Иттифоқининг ташқи ишлар ва хавфсизлик сиёсати бўйича олий вакили Кая Каллас раислик қилади. Ўзбекистон делегациясига Ўзбекистон Республикаси ташқи ишлар вазири Бахтиёр Саидов раҳбарлик қилади.

Йиғилиш давомида томонлар сиёсий, иқтисодий ва савдо масалалари бўйича фикр алмашадилар, шунингдек, ҳамкорликнинг турли йўналишларини муҳокама қиладилар. Улар орасида ички ва конституциявий ислоҳотлар, адлия ва ички ишлар соҳаси, инсон ҳуқуқлари, гендер тенглиги, қонун устуворлиги, шунингдек, Ўзбекистоннинг GSP+ ташаббуси доирасидаги мақоми, Жаҳон савдо ташкилотига аъзо бўлиш жараёни, савдо тўсиқлари ва чекловлари, муҳим хомашёлар (CRM), ўзаро боғлиқлик ва энергетика соҳаларига оид масалалар бор.

Бундан ташқари, томонлар минтақавий ва халқаро масалаларни ҳам муҳокама қиладилар, жумладан, санкциялар билан боғлиқ хатарларни камайтириш бўйича ҳамкорликни кўриб чиқадилар.