КРТ 24,56 миллиард сўмни дивидендларга йўналтирди — акцияга 18,27 сўм

Тошкент, Ўзбекистон (UzDaily.uz) — «Савдони ривожлантириш компанияси» (КРТ)нинг 2024 йилдаги 49,12 миллиард сўмлик соф фойдаси ягона акциядор — Давлат активларини бошқариш агентлиги (ДАБА)нинг 2025 йил 16 сентябрда қабул қилинган қарорига мувофиқ тақсимланди.

Ушбу маблағдан 24,56 миллиард сўм дивидендлар тўлашга, яъни акцияга 18,27 сўмдан ҳисобланди. 24,30 миллиард сўм захира жамғармасини шакллантиришга йўналтирилди, 245,59 миллион сўм эса компаниянинг инновацион фаолиятини қўллаб-қувватлаш жамғармасига ажратилди.

Шу билан бирга, КРТнинг устав капитали 12 миллиард сўмга камайтирилиб, 1,33 триллион сўм этиб белгиланди. Таъкидланишича, бундай тузатиш устав капиталини шакллантиришда аниқланган фарқлар билан боғлиқ.

КРТ фаолиятини ягона акциядор номидан Ўзбекистон Савдо-саноат палатаси раиси Даврон Ваҳобов бошқармоқда. Унинг ваколатлари давлат номидан ДАБА томонидан 2024 йил 2 декабрда берилган ишончнома билан мустаҳкамланган.