Krispy Kreme Ўзбекистон бозорига кирмоқда

Тошкент, Ўзбекистон (UzDaily.uz) — Американинг янги пиширилган донатлари ва машҳур Hot Light ёзуви билан танилган бренд, Krispy Kreme компанияси 2025 йил октябрь ойида Ўзбекистондаги илк дўконини расман очади.

Бренднинг дебюти Тошкент шаҳрида бўлиб ўтади. Krispy Kreme бу ерда Food Town Logistics-Group, LLC компанияси билан ҳамкорликда фаолиятни бошлайди.

Шартнома доирасида ўзбек франчайзиси тез суръатда ривожланишни режалаштирмоқда — келгуси беш йил ичида мамлакат бўйлаб 70 тадан ортиқ дўкон очиш мўлжалланган.

Krispy Kreme бош директори Жош Чарльсвортнинг таъкидлашича, Ўзбекистондаги фаолиятни бошлаш компаниянинг халқаро бозорларда ўз иштирокини кенгайтиришга қаратилган глобал стратегиясининг бир қисми ҳисобланади:

«Биз Krispy Kreme шодлигини дунё бўйлаб янги мухлислар билан баҳам кўраётганимиздан мамнунмиз. Испаниядан то Бразилия ва Ўзбекистонгача — бизни ҳамма жойда бир нарса бирлаштиради: илк бор бизнинг илиқ, янги пончикларимизни татиб кўраётган одамларнинг қувончи».

Ўзбекистон бозорига кириш бренднинг халқаро кенгайишининг янги тўлқинида муҳим босқич бўлади. 2025 йилда компания Испаниянинг Мадрид шаҳрида илк дўконини очди ва ҳозирда Бразилияда савдо нуқталарини ишга туширишга тайёргарлик кўрмоқда.

1937 йилда асос солинган Krispy Kreme АҚШнинг Уинстон-Сейлем шаҳридаги кичик нонвойхонадан бошлаб, ҳозирги кунда дунёнинг 40 дан ортиқ мамлакатида фаолият юритаётган глобал тармоққа айланган.