Корея компанияларини «Tashkent Pharma Park» фармацевтика кластерига жалб этиш бўйича музокаралар ўтказилди

Тошкент, Ўзбекистон (UzDaily.uz) — Фармацевтика тармоғини ривожлантириш агентлиги директори Абдулла Азизов “The Standard Co., Ltd” компанияси президенти Жаноб Ким Соннам ҳамда “Korea Medical Devices Association” ижроия директори Жаноб Хан Ёнсуб билан музокаралар ўтказди.

Суҳбат чоғида корей компанияларини «Tashkent Pharma Park» фармацевтика кластерига жалб этиш масалалари муҳокама қилинди.

Корея томони «Tashkent Pharma Park» фармацевтика кластерига ҳудудида Корея тиббий ускуналар ишлаб чиқарувчилари ассоциацияси ваколатхонасини очишга қизиқиш билдирди.

Ушбу ваколатхона орқали 30 дан ортиқ кореялик тиббий ускуна ишлаб чиқарувчи компаниялар фаолияти йўлга қўйилиши режалаштирилмоқда.

Келгуси ҳамкорлик йўналишлари бўйича батафсил танишув мақсадида “Korea Medical Devices Association” ва “The Standard Co., Ltd” раҳбариятининг Ўзбекистонга ташрифи 2026 йил март ойига белгиланди.