Тошкент, Ўзбекистон (UzDaily.uz) — Хитойнинг Jianhua Ceramics компанияси томонидан “Қўқон” ЭИЗ ҳудудида амалга оширилаётган йирик инвестиция лойиҳаси якуний босқичга кирди.

Бу ҳақида вилоят ҳокими Хайрулло Бозоров қабулида бўлган компания раҳбари Ву Хон Цян маълум қилди.

Керамика маҳсулотлари ва кафель ишлаб чиқариш йўналишидаги мазкур лойиҳага хитойлик инвесторларнинг 50 млн. доллар тўғридан - тўғри инвестицияси жалб қилинган.

Ишлаб чиқарилган маҳсулотлар асосан ички бозорга, шунингдек, қўшни давлатларга экспортга чиқарилиши кўзда тутилган.

Учрашувда лойиҳани ишга тушириш билан боғлиқ техник жараёнлар, зарурий муҳандислик - коммуникация тармоқларини тортиш ишларининг ҳолати, иш ўринларини яратиш масалалари ҳақида сўз борди.

Jianhua Ceramics раҳбари лойиҳа ҳар томонлама қўллаб-қувватланаётгани учун миннатдорлик билдириб, март ойида ишлаб чиқаришни бошлаш режалаштирилаётганини таъкидлади.