Жанубий Корея фармацевтика компаниялари Ўзбекистонда ишлаб чиқаришни кенгайтиришга қизиқиш билдиришди

Тошкент, Ўзбекистон (UzDaily.uz) — Фармацевтика тармоғини ривожлантириш агентлиги директори Абдулла Азизов Кореяга хизмат сафари давомида ушбу мамлакатнинг «Daehan Pharm», «Kunil Pharm», «Corepharm», «JW Holdings», «MetaOnTech», «Sungsim Eng» ва «Firson» фармацевтика компаниялари билан амалий музокаралар ўтказди.

Учрашувлар натижасида «Daehan Pharm» ва «JW Holdings» компаниялари Ўзбекистонда ўз фаолиятини кенгайтиришга қизиқиш билдириб, хусусан «Tashkent Pharma Park» фармацевтика кластерида инфузион эритмалар, инъекциялар ҳамда косметик маҳсулотлар ишлаб чиқаришни йўлга қўйиш бўйича лойиҳаларни кўриб чиқишга тайёрлигини маълум қилди. Мазкур йўналишда музокаралар белгиланган тартибда давом эттирилади.

Шунингдек, «Sungsim Eng» компанияси маҳаллий ҳамкор топишда кўмак бериш ва ўз маҳсулотларини Ўзбекистонга экспорт қилишни йўлга қўйишда амалий ёрдам кўрсатишни сўради.