Истиқболли лойиҳалар миллий агентлиги SEMURG INSURANCE АЖ лицензиясини 10 кунга тўхтатди

Тошкент, Ўзбекистон (UzDaily.uz) — Ўзбекистон Республикаси Истиқболли лойиҳалар миллий агентлиги SEMURG INSURANCE акциядорлик жамияти лицензиясининг амал қилиши вақтинча тўхтатилганини маълум қилди. Қарор 2026 йил 19 январдан кучга кириб, 10 кун муддатга белгиланган. Компанияга 2025 йил 7 октябрда 1081744-сонли лицензия берилган эди.

Лицензия амал қилиши тўхтатилган даврда SEMURG INSURANCE АЖга янги суғурта ва қайта суғурталаш шартномаларини тузиш, шунингдек амалдаги шартномаларни узайтириш тақиқланади. Шу билан бирга, компания илгари тузилган шартномалар бўйича ўз мажбуриятларини тўлиқ ҳажмда бажариши шарт.

Агентлик хабарида суғурта хизматлари истеъмолчиларига лицензия вақтинча тўхтатилишига асос бўлган камчиликлар бартараф этилгунга қадар SEMURG INSURANCE билан янги шартномалар тузмаслик тавсия этилган.

Лицензия амал қилишини тўхтатиш тўғрисидаги қарор «Суғурта фаолияти тўғрисида»ги қонуннинг 47-моддаси, «Лицензиялаш, рухсат бериш ва хабардор қилиш тартиб-таомиллари тўғрисида»ги қонуннинг 32-моддаси, шунингдек Вазирлар Маҳкамасининг 2022 йил 21 февралдаги 80-сон қарори билан тасдиқланган махсус электрон тизим орқали айрим фаолият турларини лицензиялаш тартиби тўғрисидаги Ягона низомнинг 41-банди асосида қабул қилинган.