Ғишткўприк божхона пости интеллектуал марказга айлантирилади

Тошкент, Ўзбекистон (UzDaily.uz) — Бугун Божхона қўмитаси Раиси А. Мавлонов улкан қурилиш-бунёдкорлик ишлари давом эттирилаётган «Ғишткўприк» чегара божхона постида бўлди.

Эндиликда 9 гектар майдонни қамраб олган мазкур объект шунчаки рақамлашган пост эмас, балки интеллектуал божхона пости сифатида қайта намоён бўлади.

Шу вақтга қадар жисмоний шахслар учун тадбиқ этилган икки йўлакли - «яшил» ва «қизил» йўлак тизим эндиликда енгил автотранспорт воситалари учун ҳам жорий қилинади.

Бунинг учун айнан ушбу постга нафақат республикада, балки минтақада илк бор енгил автотранспорт воситалари учун мўлжалланган "З портал" сканер мажмуаси ўрнатилди.

Постда навбатларнинг олдини олиш мақсадида 16 та авто йўлак қурилди, автобуслар ҳам алоҳида йўлакларда ҳаракатланади.

Натижада, пост орқали бир кунда 1500 дан зиёд автотранспорт воситалари ва 50 минг нафардан зиёд йўловчилар бемалол ҳаракатланишлари мумкин.

Постда “яшил энергия”дан фойдаланишга алоҳида эътибор қаратилди. Қуёш панеллари бир вақтнинг ўзида энергия билан таъминлайди ва автотураргоҳ вазифасини ҳам ўтайди.

Қўмита Раиси пост ҳудудини кўкаламзорлаштиришга ҳам эътибор қаратди. Постни қайта қуриш жараёнида мавжуд дарахтлар сақлаб қолинди, бунинг учун қурилиш лойиҳалаш ишлари дарахтлар жойлашувидан келиб чиқиб амалга оширилди.

Шунингдек, жорий кузги мавсумнинг ўзида яна 2 мингта кўчатлар экилди.