Франсиянинг POMA компанияси Наманган вилоятида канат йўллари қуришни таклиф қилди

Тошкент, Ўзбекистон (UzDaily.uz) — Франциянинг POMA компанияси вакиллари Наманган вилоятининг тоғли ва туристик ҳудудларида канатли йўллар барпо этиш таклифи билан келди.

POMA S.A.S. — француз компанияси бўлиб, кабелли транспорт тизимларини лойиҳалаш, ишлаб чиқариш, ўрнатиш, эксплуатация қилиш ва хизмат кўрсатиш билан шуғулланади. Бундай тизимлар туристлар, аҳоли ва саноат учун экологик тоза, қулай ва барқарор транспорт ечимлари ҳисобланади. Дунё бўйлаб 90 дан ортиқ мамлакатда фаолият юритади, ҳозирга қадар 8 мингдан ортиқ кабелли транспорт тизимларини ўрнатган.

Наманган вилояти ҳокими Шавкатжон Абдураззоқов POMA компаниясининг Марказий Осиё мамлакатлари бўйича менежери Антон Чудаевни қабул қилди.

Ўзаро мулоқотда Наманган вилоятининг тоғли ҳудудларида замонавий, жаҳон стандартларига жавоб берадиган канатли йўллар қуриш бўйича фикр-мулоҳазалар алмашилди.

Хусусан, Поп тумани “Арашан” кўли атрофи ва унга туташ ҳудудда йирик туризм комплекси қуриш лойиҳаси, шунингдек, Поп, Янгиқўрғон туманлари туризм қишлоқлари имкониятлари кўриб чиқилди.

POMA компанияси томонидан ушбу йўналишларда лойиҳалар ишлаб чиқилиб, тақдим этиладиган бўлди.

Албатта, ушбу йўналишда дунёда ўзига хос тажрибага эга йирик компаниялар билан ҳамкорлик Наманганнинг туризм салоҳиятини янада ривожлантиришда муҳим аҳамиятга эга.