Франция ва Ўзбекистон атроф-муҳит, иқлим ва қайта тикланадиган энергия бўйича ҳамкорликни муҳокама қилмоқда

Тошкент, Ўзбекистон (UzDaily.uz) — Франциянинг Ўзбекистондаги элчиси Уалид Фук Экология, атроф-муҳит ва иқлим ўзгаришлари вазири Азиз Абдуҳакимов билан илк учрашувини ўтказди.

Томонлар атроф-муҳит ва иқлим ўзгариши бўйича бўлажак халқаро тадбирларни муҳокама қилиб, ноябрь ойида Белемда бўлиб ўтадиган СОП конференциясида улкан натижаларга эришиш муҳимлигини таъкидладилар.

Франция тараққиёт агентлиги ва француз компаниялари билан ҳамкорликнинг йўналишлари, жумладан, Қорақалпоғистонда Орол денгизининг йўқолиши оқибатларини юмшатиш, қайта тикланадиган энергия манбаларини ривожлантириш, сув ресурсларидан фойдаланиш самарадорлигини ошириш, чиқиндиларни қайта ишлаш лойиҳалари муҳокама қилинди.

Шунингдек, учрашувда Ўзбекистонда туризмни ривожлантириш ва француз тилини ўқитиш масалалари кўриб чиқилиб, мамлакатлар ўртасидаги маданий-маърифий ҳамкорликни кенгайтириш истиқболлари белгилаб олинди.